តើគួរយកកម្ចីទិញផ្ទះពីធនាគារ ឬបង់ផ្ទាល់ជាមួយម្ចាស់គម្រោង?

ការទិញផ្ទះនៅកម្ពុជាគេឃើញថាត្រូវបានធ្វើឡើងក្នុងរូបភាពពីរគឺការបង់ផ្តាច់ និងបង់រំលស់។ ក្នុងនោះដែរការបង់រំលស់អាចធ្វើឡើងពីរបែបទៀតគឺបង់តាមធនាគារ និងបង់ជាមួយអ្នកអភិវឌ្ឍន៍។ ចំពោះអ្នកដែលមានលទ្ធភាពទិញផ្ទះផ្តាច់ គេមិនមានក្តីបារម្ភទាក់ទងនឹងការបង់ប្រាក់ដើម្បីទទួលបានផ្ទះនោះទេ។ ប៉ុន្តែ ចំពោះអ្នកដែលមិនសូវមានលទ្ធភាព គេច្រើនប្រើវិធីសាស្រ្តបង់រំលស់ដើម្បីទទួលបានផ្ទះ ដែលខ្លួនឯងចង់បាន។ ចំពោះការបង់រំលស់នេះទៀតសោត គេតែងចោទជាសំនួរថា តើកម្ចីទិញផ្ទះពីធនាគារ និងបង់រំលស់ជាមួយម្ចាស់គម្រោងផ្ទាល់ មួយណាល្អជាង?

តើគួរយកកម្ចីទិញផ្ទះពីធនាគារឬ?

ជាធម្មតា ស្តង់ដាធ្វើការនៅធនាគារតែងតែមានលក្ខណៈស្មុគស្មាញជាងធម្មតា ប៉ុន្តែអាច​ធានាសុវត្ថិភាពហិរញ្ញវត្ថុក្នុងពេលអនាគតយ៉ាងល្អ។ ហេតុនេះហើយកម្ចីទិញផ្ទះពីធនាគារររមែង តែងតែតម្រូវឲ្យបំពេញលក្ខខណ្ឌជាច្រើន។

ប្រសិនបើអ្នកមានបំណងខ្ចីប្រាក់ពីធនាគារ អ្នកត្រូវឆ្លងកាត់ភាពស្មុគស្មាញខាងក្រោមនេះ៖

ការត្រួតពិនិត្យភាពស្របច្បាប់នៃគម្រោង

ធនាគារនឹងពិនិត្យពិច័យយ៉ាងម៉ត់ចត់ទៅលើភាពស្របច្បាប់របស់គម្រោង និងឯកសារកម្មសិទ្ធិនៃអចលនទ្រព្យ បើមិនដូច្នោះទេធនាគារនឹងបដិសេដក្នុងការផ្តល់ប្រាក់កម្ចី។

ភាពជាកម្មសិទ្ធិ

អ្នកទិញអាចទទួលបានប្លង់កម្មសិទ្ធិភ្លាមៗបន្ទាប់ពីទិញរួច  (បើបង់ជាមួយគម្រោង អ្នកទិញអាចទទួលបានប្លង់ ដរាបណាបង់ប្រាក់បាន ១០០%)។

ការសិក្សាពីលទ្ធភាពសងត្រលប់

ធនាគារ ពិនិត្យយ៉ាងម៉ត់ចត់នូវឯកសារផ្សេងៗ ដូចជា៖ ឯកសារប្រាក់ចំណូលប្រចាំខែរបស់អតិថិជនជាដើម ដើម្បីប្រាកដថាអ្នកអាចមានលទ្ធភាពសងត្រលប់មកធនាគារវិញបាន។ លើសពីនេះធនាគារក៏តម្រូវឲ្យមានទ្រព្យតម្កល់ផងដែរ។

ប្រាក់តម្កល់

ធនាគារជាទូទៅក៏វាយតម្លៃផ្ទះក្នុងតម្លៃទីផ្សារផងដែរ។ ប៉ុន្តែការវាយតម្លៃនោះមិនសូវមានតម្លៃខ្ពស់នោះទេ។ មិនតែប៉ុណ្ណោះអ្នកទិញក៏តម្រូវឲ្យមានប្រាក់កក់យ៉ាងតិចចំនួន ២៥% ឬ ៣០% នៃតម្លៃផ្ទះផងដែរ។

អត្រាការប្រាក់

ក្នុងការកំណត់ការប្រាក់ ធនាគារដាក់ការប្រាក់ទាបជាងការប្រាក់របស់ម្ចាស់គម្រោងអភិវឌ្ឍន៍។ រហូតដល់ ៤ % ទៅ ៥% ឯណោះ។ ជាទូទៅអត្រាការប្រាក់ដែលដាក់ដោយធនាគារអាចមានចាប់ពីជិត ៧% ឡើងទៅ (ប្រចាំឆ្នាំ)ជាមួយនឹងរយៈពេលកម្ចីពី ១៥- ២០ ឆ្នាំ។

ចុះបើខ្ញុំចង់បង់រំលស់ដោយផ្ទាល់ជាមួយអ្នកអភិវឌ្ឍន៍?

ការបង់ជាមួយម្ចាស់គម្រោងហាក់មានលក្ខណៈងាយស្រួលច្រើនសម្រាប់អ្នកទិញ ខាងក្រោមជាលក្ខខណ្ឌមួយចំនួននៃការបង់រំលស់ដោយផ្ទាល់ជាមួយគម្រោងអភិវឌ្ឍន៍៖

ការត្រួតពិនិត្យពីភាពស្របច្បាប់របស់គម្រោង

អ្នកទិញខ្លួនឯងត្រូវតែធ្វើការស្វែងយល់ឲ្យបានល្អិតល្អន់មុននឹងជ្រើសរើសគម្រោងណាមួយ។

ភាពជាកម្មសិទ្ធិ

ម្ចាស់គម្រោងអភិវឌ្ឍន៍នឹងប្រគល់ប្លង់កម្មសិទ្ធិកាន់កាប់អចលនទ្រព្យដល់អ្នកទិញនៅពេលអ្នកទិញបានបង់ដល់ចំនួនកំណត់ណាមួយ។

មិនចាំបាច់មានប្រាក់តម្កល់

គម្រោងមួយចំនួនបានផ្តល់លទ្ធភាពដល់អ្នកទិញបង់រំលស់ដោយមិនបាច់មានប្រាក់កក់ ប៉ុន្តែក៏មានគម្រោងមួយចំនួនបានតម្រូវឲ្យអតិថិជនកក់ប្រាក់មុនផងដែរ។

អត្រាការប្រាក់ខ្ពស់

ម្ចាស់គម្រោងអភិវឌ្ឍន៍បានកំណត់អត្រាការប្រាក់ខ្ពស់ជាងកម្ចីពីធនាគារ។ តាមការលើកឡើងរបស់អ្នកទិញជាច្រើន ពួកគេបានលើកឡើងថាក្នុងរយៈពេល ១៥ ឆ្នាំនៃការបង់រំលល់ជាមួយគម្រោង ថ្លៃដើម និងថ្លៃការប្រាក់អាចមានចំនួនស្នើគ្នា ឬលើសពីនេះ។

ការសិក្សាពីលទ្ធភាពសងត្រលប់

ជាទូទៅ គេសង្កេតឃើញថាម្ចាស់គម្រោងអភិវឌ្ឍន៍មិនសូវពិនិត្យឲ្យបានច្បាស់ពីលទ្ធភាព ដែលអតិថិជនអាចបង់បានឬមិនបាននោះទេ។ ចំណុចនេះចំណុចដ៏គ្រោះថ្នាក់សម្រាប់អ្នកទិញ ប្រសិនបើពេលណាមួយពួកគេអស់លទ្ធភាពបង់ប្រាក់។

បើផ្អែកតាមអ្វីដែលបានរៀបរាប់ខាងលើលក្ខខណ្ឌទាំងអស់នេះហាក់បីការបង់តាមធនាគារហាក់មានភាពស្មុគស្មាញខ្លាំងប៉ុន្តែវាអាចធានាការពារថាហានិភ័យនៅពេលអនាគត។ ប៉ុន្តែប្រសិនបើអ្នកអាចសិក្សាពីលទ្ធភាពខ្លួនឯង និងភាពស្របច្បាប់នៃគម្រោងបានច្បាស់លាស់ហើយ ការបង់ជាមួយម្ចាស់គម្រោងអាចជាជម្រើសល្អមួយដែរ ក្នុងករណីអ្នកមិនលទ្ធភាពខ្ចីធនាគារ។  

រំលឹកផងដែរថា ការជួបប្រឹក្សាជាមួយអ្នកជំនាញ ឬភ្នាក់ងារធនាគារគឺជាជម្រើសដ៏ល្អមួយសម្រាប់អ្នក។

ស្វែងរកកម្ចីទិញផ្ទះជាមួយធនាគារ សូមចូលទោកាន់ Homeloan.com.kh!