ក្នុងរយៈពេលជាង២ឆ្នាំមកនេះប្រទេសកម្ពុជា និងពិភពលោកបានប្រឈមទៅនឹងវិបត្តិកូវីដដែលកើតមានឡើងសម្រាប់មនុស្សគ្រប់គ្នា ដែលបណ្តាលឱ្យមានផលប៉ះពាល់តិច ឬច្រើន និងវិស័យខ្លះបានទទួលរងឥទ្ធិពលខ្លាំង ហើយវិស័យខ្លះតិច ។ ដោយឡែកនៅក្នុងវិស័យអចលនទ្រព្យបានទទួលរងនូវផលប៉ះពាល់គួរសមដែរនៅរយៈពេលប៉ុន្មានឆ្នាំចុងក្រោយនេះ ។
សម្រាប់បរិបទសម័យកូវីដ-១៩ការបិទការលក់អចលនទ្រព្យគឺជារឿងដែលពិបាកសម្រាប់ភ្នាក់ងារលក់អចលនទ្រព្យ ពោលគឺការបិទការលក់ ឬ Close Deal នេះវាទាមទារឱ្យភ្នាក់ងារអចលនទ្រព្យត្រូវអត់ធ្មត់ និងត្រូវប្រើប្រាស់យុទ្ធសាស្ត្រក្នុងការបិទការលក់របស់ខ្លួនដើម្បីទទួលបានជោគជ័យក្នុងការលក់អចលនទ្រព្យ ។
លោក ពឹង សេរី អនុប្រធានសមាគម CVEA បានចោទជាសំណួរក្នុងកម្មវិធី «ការផ្ដល់ប្រឹក្សាអាជីវកម្មអចលនវត្ថុ» ថា តើមានយុទ្ធសាស្ត្រអ្វីដើម្បីបិទការលក់ (Close Deal) ក្នុងសម័យកូវីដ-19នេះ?
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) បានឆ្លើយតប និងចែករំលែកនូវយុទ្ធសាស្ត្រមួយចំនួនទៅកាន់ភ្នាក់ងារលក់សម្រាប់ការបិទការលក់អចលនទ្រព្យដោយលោកបានមានប្រសាសន៍ថា ចរន្តនៃការទិញលក់មានការធ្លាក់ចុះមួយចំនួនធំក៏ប៉ុន្តែបើសួរថាមនុស្សនៅឈប់ទិញឬទេ គឺនៅមិនទាន់នោះទេ នៅតែបន្តក្នុងការទិញលក់ ក៏ប៉ុន្តែចំនួននៃការទិញលក់របស់ពួកគាត់ត្រូវការជម្រើស របស់ណាដែលល្អបំផុត និងជម្រើសនៃការទូទាត់ល្អ ។
លោកបានបន្តថា នៅក្នុងបរិបទសម័យកូវីដនេះ ការទិញលក់មួយចំនួនធំទទួលបានជោគជ័យគឺការផ្តល់នូវដំណោះស្រាយផ្នែកហិរញ្ញវត្ថុតាមរយៈការណែនាំឱ្យពួកគាត់ទទួលបាននូវប្រាក់កម្ចី ឬមួយតាមរយៈភ្នាក់ងារដែលធ្វើការយ៉ាងជិតស្និទតាមប្រព័ន្ធធនាគារដែលអាចទិញលក់ជាបណ្តោះអាសន្ននៅក្នុងបរិបទណាមួយ ។
លោកបានឱ្យដឹងបន្ថែមផងដែរថា ចំណុច១ទៀតគឺនិយាយអំពីកម្លាំង (ចំនួនភ្នាក់ងារដែលលក់អចលនទ្រព្យ) នៅពេលដែលគាត់មានបណ្តាញល្អផ្តល់ព័ត៌មានទៅដល់អតិថិជនដល់គោលដៅនោះគឺជាកត្តាចម្បងហើយទទួលបានការគាំទ្រត្រលប់មកវិញពីអតិថិជនរបស់ពួកគាត់ ។
លោក ច្រឹក សុខនីម បានបញ្ជាក់សម្រាប់ភ្នាក់ងារលក់អចលនទ្រព្យដែលអាចលក់បានជោគជ័យត្រូវមានគោលដៅច្បាស់លាស់ តើចង់លក់អចលនទ្រព្យនេះទៅឱ្យប្រភេទអតិថិជនគោលដៅមួយណា? ពីព្រោះអតិថិជនមានធនធានហិរញ្ញវត្ថុ និងប្រភេទចំណេះដឹងផ្សេងៗគ្នា ។
មិនតែប៉ុណ្ណោះភ្នាក់ងារលក់អចលនទ្រព្យត្រូវមានចំណេះដឹងទាក់ទងនឹងវិស័យអចលនទ្រព្យថាតើការពន្យល់ឱ្យអតិថិជនរបស់គាត់ជឿជាក់ទៅលើគាត់អាស្រ័យទៅលើការចេះតែថា ឬមួយលើកអំពីទឡ្ហីករណ៍ដែលកើតមានឡើង ពីព្រោះភ្នាក់ងារអចលនទ្រព្យដែលមានវិជ្ជាជីវៈ ហើយអតិថិជនតែងតែជឿគឺតែងតែមានចំណេះដឹង និងលើកឡើងពីទឡ្ហីករណ៍ទាំងឡាយណាដែលអាចទទួលយកបាន ។
ប្រធានសមាគម CVEA ក៏បានសង្កត់ធ្ងន់ផងដែរថា ក្នុងនាមជាភ្នាក់ងារលក់អចលនទ្រព្យភាពស្មោះត្រង់គឺត្រូវមានចាំបាច់បំផុត មិនមែនចេះតែនិយាយប្រូឱ្យគេជឿនោះទេ ពោលគឺត្រូវចេះលើកឡើងពីទឡ្ហីករណ៍ច្បាស់លាស់ទៅកាន់អតិថិជន ៕
Comments