ទីផ្សារអចលនទ្រព្យក្នុងប្រទេសកម្ពុជានៅតែមានកំណើនជានិច្ចបើទោះបីជាត្រូវរងផលប៉ះពាល់ពីវិបត្តិកូវីដ-១៩ក៏ដោយ ជាពិសេសដីធ្លីកាន់តែមានសន្ទុះកើនឡើងជាបន្តបន្ទាប់ ។ ស្របពេលនេះផងដែរ ចរន្តនៃការទិញ-លក់ដីធ្លីកាន់តែមានតម្រូវការច្រើនឡើងៗដោយសារតែវាហុចផលចំណេញខ្ពស់សម្រាប់អ្នកវិនិយោគ ។ ដូច្នេះតើគួរទិញដីប្រភេទណាទើបទទួលបានផលចំណេញខ្ពស់?
ទី១- ដីដែលមានតម្លៃទាប
ជាធម្មតាដីដែលមានតម្លៃទាប មានម៉ូយច្រើនងាយស្រួលលក់ចេញ ។ ជាក់ស្តែងដូចជាដីដែលនៅតំបន់ជាយក្រុងជាដើមដែលមានតម្លៃចន្លោះពី១០ទៅ៣០ដុល្លារ ឬ៥០ទៅ១០០ដុល្លារក្នុងមួយម៉ែត្រការ៉េ ដែលវាអំណោយផលសម្រាប់អ្នកដែលមានកម្រិតជីវភាពមធ្យមអាចទិញបាន និងងាយឆាប់រកចេញបានលឿន ។ ហើយបើដីនោះមានទីតាំងជាប់ផ្លូវធំ ឬស្ថិតក្នុងផែនការអភិវឌ្ឍន៍របស់រាជរដ្ឋាភិបាលទៀតគឺកាន់តែល្អប្រសើរ ។
ទី២- ដីតម្លៃចន្លោះពី៣០០ទៅ៥០០ដុល្លារ/ម៉ែត្រការ៉េ
សម្រាប់ដីដែលមានតម្លៃចន្លោះចាប់ពី៣០០ទៅ៥០០ដុល្លារ/ម៉ែត្រការ៉េហាក់មានភាពពិបាកលក់បន្តិច ប៉ុន្តែនៅតែមានឱកាសក្នុងការចំណេញព្រោះអ្នកដែលទិញដីប្រភេទនេះភាគច្រើនអាចទិញដើម្បីទុកសាងសង់ផ្ទះលក់ ឬវិនិយោគទុកធ្វើអ្វីផ្សេងៗជាដើម ។ ដីដែលស្ថិតក្នុងតម្លៃចន្លោះចាប់ពី៣០០ទៅ៥០០ដុល្លារ/ម៉ែត្រការ៉េនេះ ប្រសិនដីដែលមានទំហំតូចគឺមានភាពងាយស្រួលជាងដីដែលមានទំហំធំចាប់ពី១០ហិកតាឡើងទៅ ព្រោះអ្នកដែលអាចទិញដីដែលមានទំហំធំបែបនេះភាគច្រើនទិញដើម្បីសាងសង់បុរីសម្រាប់លក់ ។
ទី៣- ដីតម្លៃចាប់ពី៦០០ដល់១០០០ដុល្លារ/ម៉ែត្រការ៉េ
ដីប្រភេទនេះភាគច្រើនអ្នកដែលអាចទិញបានគឺទិញដើម្បីសាងសង់ផ្ទះវីឡាប្រណីតៗដែលមានតម្លៃខ្ពស់ខ្ទង់៣០ម៉ឺនទៅ១លានដុល្លារ ។ ពោលដីដែលមានតម្លៃចាប់ពី៦០០ដល់១០០០ដុល្លារ/ម៉ែត្រការ៉េគឺមានភាពពិបាកក្នុងការស្វែងរកអតិថិជនសម្រាប់ទិញណាស់ ប៉ុន្តែប្រសិនបើអាចលក់ចេញបានច្បាស់ជាទទួលបានផលចំណេញកប់ពពក ៕
Comments