មជ្ឈមណ្ឌលពាណិជ្ជកម្ម AMASS Business Center គឺជាអគារការិយាល័យកម្រិតមធ្យមមានទីតាំងស្ថិតនៅកណ្ដាលរាជធានីភ្នំពេញ ដែលជាអគារការិយាល័យទំនើបត្រូវបានរចនាម៉ូដ និងស្ថាបនាឡើងដោយក្រុមហ៊ុន GL Ko Construction Co., Ltd. ប្រភពពីប្រទេសកូរ៉េខាងត្បូង។ អគារការិយាល័យនេះបានបញ្ចប់ការសាងសង់ជាស្ថាពរក្នុងឆ្នាំ ២០២០ និងបានត្រៀមខ្លួនរួចជាស្រេចក្នុងការទទួលស្វាគមន៍ក្រុមហ៊ុនពាណិជ្ជកម្មធ្វើការកាន់កាប់យូនីតការិយាល័យក្នុងអគារពាណិជ្ជកម្មដ៏ទំនើបនេះ។

មជ្ឈមណ្ឌល AMASS Business Center មានទីតាំងយ៉ាងអំណោយផលស្ថិតនៅកណ្ដាលសង្កាត់បឹងកេងកង១ (ត្រូវបានគេស្គាល់ថាជាតំបន់ស្ថានទូតដ៏មានកិត្យានុភាព) ដែលគេចាត់ទុកថាជាទីតាំងមានភាពរីកចម្រើន និងមានតម្លៃបំផុតក្នុងរាជធានីភ្នំពេញ។ អគារ AMASS Business Center ត្រូវបានហ៊ុមព័ទ្ធដោយមហាវិថីធំៗចំនួន៤ ព្រមទាំងប្រមូលផ្ដុំទៅដោយ សណ្ឋាគារ ហាងកាហ្វេ បារ ធនាគារ និង ផ្សារទំនើបជាច្រើនទៀត។ បន្ថែមលើនេះទៀត មជ្ឈមណ្ឌលពាណិជ្ជកម្មនេះព័ទ្ធជុំវិញដោយគម្រោងខុនដូលំដាប់ខ្ពស់ និង អគារការិយាល័យជាច្រើនទៀត។

មជ្ឈមណ្ឌល AMASS Business Center ត្រៀមលក្ខណៈរួចជាស្រេចដើម្បីបំពេញតម្រូវការចាំបាច់របស់បុគ្គលិកការិយាល័យនាសម័យទំនើប។ អគារពាណិជ្ជកម្មនេះ មានកម្ពស់ ២៥ ជាន់ និងមានយូនីតសរុបចំនួន ៥០ ដែលអាចបម្រើជាការិយាល័យសម្រាប់ក្រុមហ៊ុនជាង ៥០ ផ្សេងគ្នា។ ទីធ្លាអគារចំនួន ២៤ ជាន់នឹងត្រូវប្រើប្រាស់ជាយូនីតការិយាល័យ ខណៈដែលជាន់ទី ២៥ ត្រូវបានរចនាទៅជាស្កាយបារ៍ដ៏ប្រណីត ដែលអាចឱ្យបុគ្គលិកក្នុងអគារសម្រាកលម្ហែកាយ និងរំសាយភាពនឿយហត់ក្រោយម៉ោងការងារ។ ជាមួយនឹងទីតាំងយ៉ាងអំណោយផល អមដោយការរចនាស្ថាបត្យកម្មនិងការបញ្ចប់ផ្នែកខាងក្នុងយ៉ាងស្អាតឆើតឆាយ មជ្ឈមណ្ឌលពាណិជ្ជកម្ម AMASS Business Center បង្កើតបាននូវបរិយាកាសការងារយ៉ាងឥតខ្ចោះសម្រាប់ការិយាល័យសម័យទំនើប។

បើនិយាយពីគ្រឿងបរិក្ខារវិញ គ្រប់យូនីតសុទ្ធសឹងតែត្រូវបានបំពាក់ដោយប្រព័ន្ធម៉ាស៊ីនត្រជាក់រួម បណ្ដាញរន្ធដោតភ្លើង (បង្កប់នៅក្នុងកម្រាល) ប្រព័ន្ធការពារសម្លេង ព្រមទាំងប្រព័ន្ធសន្តិសុខយ៉ាងដិតដល់ មានដូចជា ឧបករណ៍គ្រប់គ្រងការចេញចូល ឧបករណ៍បន្លឺសម្លេងនៅពេលមានអគ្គិភ័យ ប្រព័ន្ធពន្លត់អគ្គិភ័យដោយស្វ័យប្រវត្តិ និងកាមេរ៉ាសុវត្ថិភាព អមដោយសេវាកម្មអចលនទ្រព្យប្រកបដោយគុណភាពខ្ពស់។

ពាណិជ្ជករ ដែលជ្រើសរើសការិយាល័យនៅទីនេះ នឹងទទួលបានគុណប្រយោជន៍យ៉ាងពិតប្រាកដពីបរិយាកាសការងារប្រកបដោយផាសុកភាព ទេសភាពទីក្រុងដ៏រស់រវើក ព្រមទាំងអាចកម្សាន្តនៅលើស្កាយបារ៍ដ៏ទំនើប និងទទួលបានផាសុកភាពពីប្រព័ន្ធចតយានយន្តបច្ចេកវិទ្យាមេកានិកដ៏ទំនើបថែមទៀតផង។