ទុនវិនិយោគក្នុងវិស័យសំណង់នៅទូទាំងប្រទេសឈានដល់ ៩.៣ ពាន់លានក្នុងឆ្នាំ២០១៩ កើនឡើងជាង ៧៨%

(ក្រសួងរៀបចំដែនដី នគរូបនីយកម្ម និងសំណង់)

ក្នុងឆ្នាំ២០១៩ នេះ សំណង់នៅទូទាំងប្រទេសកម្ពុជាមានចំនួន ៤,៤៤៦ គម្រោងមានផ្ទៃក្រឡាសំណង់សរុប​ជាង ១៨.៥ លានម៉ែត្រការ៉េ ក្នុងតម្លៃប៉ាន់ស្មានទុនវិនិយោគប្រមាណ ៩.៣ ពាន់លានដុល្លារអាមេរិក យោងតាមរបាយការណ៍ចុងក្រោយរបស់ក្រសួង​រៀប​​ចំដែនដី នគរូបនីយកម្ម និងសំណង់ ដែលបានផ្តល់ជូនអ្នកសារព័ត៌មាននៅថ្ងៃទី១៥ ខែធ្នូ ឆ្នាំ២០១៩។

តាមរយៈរបាយការណ៍នោះផងដែរ បើធៀបនឹងរយៈពេលដូចគ្នាក្នុងឆ្នាំ២០១៨ សំណង់នៅទូទាំងប្រទេស​កម្ពុជា​ មានចំនួនតែ ២,៨៦៧ គម្រោង មាន​ផ្ទៃក្រឡាសំណង់ចំនួនជាង ១១.៤ លា​នម៉ែត្រការ៉េ តម្លៃប៉ាន់ស្មានទុនវិនិយោគប្រមាណ ៥.២២ ពាន់លានដុល្លារ កើនឡើង ៧៨.៨៨ ភាគរយ។

គម្រោងក្នុងឆ្នាំ២០១៩

ក្នុងនោះគម្រោងអគារខ្ពស់ៗ ចាប់ពី ៥ ជាន់ឡើងទៅមានចំនួន ៤៣២ គម្រោង ស្មើនឹង ៤៣៦ អគារ។ ក្នុងនោះ

• អគារពី ៥ ជាន់ទៅ ៩ ជាន់ មានចំនួន ២០៨ អគារ 
• ពី ១០ ជាន់ទៅ ១៩ ជាន់ មាន ចំនួន ១៣៥ អគារ 
• ពី ២០ ជាន់ទៅ ២៩ ជាន់មានចំនួន ៥៧ អគារ 
• ពី ៣០ ជាន់ទៅ ៣៩ ជាន់ មានចំនួន ២៣ អគារ  
• ពី ៤០ ជាន់ឡើងទៅមានចំនួន ១៣ អគារ។

លំនៅដ្ឋានបែបបុរី និងអគារសហកម្មសិទ្ធិ

ដោយឡែកសំណង់លំនៅដ្ឋានចំនួន ៣,៧៣២ គម្រោងមានផ្ទៃក្រឡាសំណង់ចំនួនជាង ៨ លាន ម៉ែត្រការ៉េ មានទុនវិនិយោគ ៣.៦ ពាន់លានដុល្លារ ស្មើនឹង ៣៨,៤៨៨ ខ្នង។  បុរីលំនៅដ្ឋាន និងបណ្ដុំលំនៅដ្ឋានបែបបុរីនៅទូទាំងប្រទេសចំនួន ៤០ គម្រោង ស្មើនឹង ១៦,៥៨៩ ខ្នង មានផ្ទៃក្រឡាសំណង់សរុបជាង ២.៤ លានម៉ែត្រការ៉េ មានតម្លៃប៉ាន់ស្មានទុនវិនិយោគប្រមាណជាង  ៨២១ លានដុល្លារ។

បន្ថែមលើសពីនេះ របាយការណ៍ដដែលបានឲ្យដឹងថា  អគារ ផ្ទះល្វែង និងភូមិគ្រឹះនៅទូទាំងប្រទេសមាន ២០,៧៨១ ល្វែង/ខ្នង មានផ្ទៃក្រឡាកម្រាលសំណង់ជិត ៣.៥ លានម៉ែត្រការ៉េ ដែលមានតម្លៃប៉ាន់ស្មានទុន វិនិយោគប្រមាណជាង ១.២ ពាន់លានដុល្លារ។ អគារសហកម្មសិទ្ធិមាន ១៥២ គម្រោង ស្មើនឹង ១៧,៧០៧ យូនីត ដែលមានផ្ទៃក្រឡាកម្រាលសំណង់ជាង ៣ លានម៉ែត្រការ៉េ មានតម្លៃប៉ាន់ស្មានទុនវិនិយោគ ប្រមាណជាង ១.៩ ពាន់លានដុល្លារ។

សណ្ឋាគារ និងពាណិជ្ជកម្ម

យ៉ាងណាមិញ សំណង់សណ្ឋាគារនៅទូទាំងប្រទេសមានចំនួន ៦៦ គម្រោង ដែលមានតម្លៃប៉ាន់ស្មានទុន វិនិយោគប្រមាណជាង ៥៨៦ លានដុល្លារ។ សំណង់អគារពាណិជ្ជកម្មនៅទូទាំងប្រទេសមានចំនួន ៣១២ គម្រោង ដែលមានតម្លៃប៉ាន់ស្មានទុនវិនិយោគប្រមាណជាង ៣.៥ ពាន់លានដុល្លារ​ និងសំណង់អគារ រោងចក្រនៅទូទាំងប្រទេសមានចំនួន ១២១ គម្រោង មានផ្ទៃក្រឡាកម្រាលសំណង់ជាង ២ លានម៉ែត្រការ៉េ  ដែលមានតម្លៃប៉ាន់ស្មានទុនវិនិយោគប្រមាណ ១,១៤១ លានដុល្លារ។

អគារពហុមុខងារ

ចំពោះសំណង់អគារពហុមុខងារនៅទូទាំងប្រទេសមានចំនួន ៩៤ គម្រោង ស្មើនឹងជាង ៥ លានម៉ែត្រការ៉េ ដែលមានតម្លៃប៉ាន់ស្មានទុនវិនិយោគប្រមាណ ៣,០៤៨ លានដុល្លារ។

គម្រោងចាប់ពី២០០០ ដល់ឆ្នាំ២០១៩

របាយការណ៍បន្តថាគិតចាប់ពីឆ្នាំ២០០០ ដល់ឆ្នាំ២០១៩ ក្រសួងបានចេញលិខិតអនុញ្ញាតសាងសង់នៅ ទូទាំងប្រទេសចំនួន ៤៨,០០៤ គម្រោង ផ្ទៃក្រឡាសំណង់សរុបចំនួនជិត ១៣២ លានម៉ែត្រការ៉េ និងតម្លៃប៉ាន់ស្មានទុនវិនិយោគសរុបប្រមាណជាង ៥១ ពាន់លានដុល្លារ។

គម្រោងអគារខ្ពស់ៗចាប់ពី ៥ ជាន់ឡើង នៅទូទាំងប្រទេសមានចំនួន ១,៦២៤ អគារ។ ក្នុងនោះអគារ ខ្ពស់ៗមាន៖ 

• ចាប់ពី ៥ ជាន់ទៅ ៩ ជាន់មានចំនួន ៨៧២ អគារ 
• អគារចាប់ពី ១០ ជាន់ទៅ ១៩​ ជាន់មាន ចំនួន ៤៦១ អគារ 
• អគារ ចាប់ពី ២០ ជាន់ទៅ ២៩ ជាន់មានចំនួន ១៥៦ អគារ 
• អគារចាប់ ពី ៣០ ជាន់ទៅ ៣៩ ជាន់ មាន ចំនួន ៩៥ អគារ និង
• អគារចាប់ពី ៤០ ជាន់ឡើងមានចំនួន ៤០ អគារ។

ដោយឡែកគិតចាប់ពីឆ្នាំ២០១១ រហូតដល់ឆ្នាំ២០១៩ នៅខេត្តព្រះសីហនុ មានអគារចាប់ពី ៥ ជាន់ទៅចំនួន ២៣៨ អគារ។ ចំណែកគម្រោងបុរីលំនៅដ្ឋាន និងបណ្ដុំលំនៅដ្ឋានបែបបុរីនៅក្នុង រាជធានីភ្នំពេញមានចំនួន ២៩៨ គម្រោង រីឯលំនៅដ្ឋានមានលក្ខណៈជាអគារសហកម្មសិទ្ធិក្នុងរាជធានី ភ្នំពេញមានចំនួន ២២,២៦៩ យូនីត៕  

ដើម្បីទទួលបានព័ត៌មានថ្មីៗអំពីវិស័យអចលនទ្រព្យនៅក្នុងប្រទេសកម្ពុជា និងការវិវត្តន៍នានានៅក្នងវិស័យនេះ សូមធ្វើការទាញយកកម្មវិធីប្រើប្រាស់នៅលើទូរស័ព្ទដៃរបស់យើងឥឡូវនេះ។ សម្រាប់កម្មវិធី iOS និង Android។

ស្វែងរកអចលនទ្រព្យនៅភ្នំពេញ ថ្ងៃនេះ។ លោកអ្នកក៏អាចចូរអានមគ្គុទេសនៃការវិនិយោគឆ្នំា២០១៩របស់យើងបានផងដែរ!

អត្ថបទដោយ