ផ្លូវជាតិលេខ៣១ និងលេខ៣៣ នឹងប្រកាសបើកការដ្ឋានស្តារ និងលើកកម្រិតគុណភាព នៅថ្ងៃទី៣០ ខែធ្នូ ឆ្នាំ២០២២ ស្អែកនេះ ក្រោមអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា  គម្រោងស្តារ និងលើកកម្រិតគុណភាពផ្លូវជាតិលេខ៣១ មានប្រវែងប្រមាណ ៥៣,៥៣ គីឡូម៉ែត្រ គិតចេញពីផ្លូវបែកគុស (ចំណុចប្រសព្វផ្លូវជាតិលេខ៣) រហូតដល់ផ្សារកំពង់ត្រាច (ចំណុចប្រសព្វផ្លូវជាតិលេខ៣៣) ដោយមានឆ្លងកាត់ខេត្តតាកែវ និងខេត្តកំពត។ ចំណែកឯផ្លូវជាតិលេខ៣៣ មានប្រវែងប្រមាណ ៥២,៥៧គីឡូម៉ែត្រ គិតចេញពីផ្លូវជាតិលេខ៣ ត្រង់គីឡូម៉ែត្រលេខ ១៤៨+១០០ ស្ថិតក្នុងខេត្តកំពត រហូតដល់ច្រកលក (ព្រំដែនកម្ពុជា-វៀតណាម)។  ផ្លូវជាតិទាំងពីរខ្សែនេះ គឺផ្លូវតភ្ជាប់សេដ្ឋកិច្ចដ៏មានសារៈសំខាន់ ដែលមានតួនាទីក្នុងការជួយសម្រួលដល់ការធ្វើដំណើររបស់បងប្អូនប្រជាពលរដ្ឋ ភ្ញៀវទេសចរ និងការដឹកជញ្ជូនទំនិញគ្រប់ប្រភេទ ព្រមទាំងកសិផលរួមមាន ស្រូវ កៅស៊ូ ម្រេច ផលនេសាទ អំបិល និងផ្លែឈើផ្សេងៗ ទៅកាន់ទីផ្សារក្នុងស្រុក និងទីផ្សារអន្តរជាតិផងដែរ៕ កំពុងស្វែងរកទិញ-លក់ ឬជួលអចលនទ្រព្យមែនទេ? ពួកយើងអាចជួយលោកអ្នក !

រដ្ឋាភិបាលនៃប្រទេសចិនមកដល់ពេលនេះបានជួយសាងសង់​ផ្លូវដល់​ប្រទេស​កម្ពុជាចំនួន៣០ខ្សែ​ដែល​ស្មើ​នឹង​ប្រវែង​ជាង៣ពាន់គីឡូម៉ែត្រដោយចំណាយចំណាយថវិកាជិត២ពាន់​លាន​​ដុល្លារ ។ ក្នុងនោះ​មាន​ផ្លូវ​កំពុង​សាង​សង់​ជា​ច្រើន​ខ្សែទៀតតម្លៃប្រមាណ៥០០លានដុល្លារ ហើយ​ចំពោះ​ស្ពាន​នៅក្នុង​ប្រទេសកម្ពុជាវិញ ដែលមិត្តចិន​បាន​សាង​សង់ និងកំពុងសាងសង់មាន​ចំនួន៩ខ្សែផ​ង​ដែរ​សម្រាប់បម្រើប្រយោជន៍ប្រជាជនកម្ពុជាជារៀងរាល់ថ្ងៃនេះ ។ នេះបើយោងតាមប្រសាសន៍របស់សម្តេចតេជោអគ្គមហាសេនាបតីតេជោ ហ៊ុន សែន ក្នុងឱកាសអញ្ជើញជាអធិបតី​ភាពក្នុងពិធីសម្ពោធបើកការដ្ឋានសាងសង់ និង​លើក​កម្រិតគុណភាពផ្លូវជាតិលេខ៤១ កាលពីព្រឹកថ្ងៃទី២៦ ខែធ្នូ ឆ្នាំ២០២២ កន្លងទៅនេះ ។គម្រោងលើក​កម្រិតគុណភាពផ្លូវជាតិលេខ៤១នេះនឹងត្រូវអនុវត្តការសាងសង់ដោយក្រុមហ៊ុនសាជីវកម្មស្ពាន និង​ថ្នល់​ចិន CRBC និងត្រួតពិនិត្យបច្ចេក​ទេស​​ដោយ​ក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន ដោយ​ប្រើរ​យៈ​ពេល​សាង​​សង់ចំនួន៤០ខែ និងបញ្ចប់​ការ​សាង​សង់នៅអំឡុងឆ្នាំ២០២៦ ដោយត្រូវ​ចំណាយ​ថវិកា​សរុប​ប្រមាណ​ជាង​៦៧​​លានដុល្លារសហរដ្ឋអាមេរិក ដែល​ជា​ឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន រួមជា​មួយ​នឹងថវិកា​បដិភាគ​របស់​រាជរដ្ឋាភិ​បាល​កម្ពុជាសម្រាប់ការដោះស្រាយផលប៉ះពាល់ និងពន្ធអាករផ្សេងៗ ។សម្តេចតេជោនាយករដ្ឋមន្ត្រីបានថ្លែងអំណរគុណដល់រដ្ឋាភិបាលនៃប្រទេសចិនដែលបានផ្តល់ឥណទាន​សម្រាប់​លើក​កម្ពស់​គុណភាពផ្លូវជាតិលេខ៤១នេះ។ សម្តេចតេជោបន្ត​ថា គោលនយោបាយកម្ពុជាពីមុន គឺយើង​មាន​លុយ​តិច​ធ្វើផ្លូ​វ​ឱ្យបានវែង តែបច្ចុប្បន្ននេះគឺយើងត្រូវ​សាង​សង់​ផ្លូវផ្តោតលើគុណភាព និងសោភ័ណភាព គឺធ្វើផ្លូវឱ្យ​បាន​រឹង​មាំ និងស្រស់ស្អាត ។សម្តេចតេជោ ហ៊ុន សែន បានមានប្រសាសន៍រំលឹកថា ផ្លូវជាតិលេខ៤១នេះ ពីមុនជាតម្រាយផ្លូវដែលត្រូវបាន​ប្រើ​ប្រាស់​​តាំងពីសម័យព្រះបាទអង្គឌួងមកម្លេះ ពោលគឺក្នុងសតវត្សរ៍ទី១៩ ក្នុងការតភ្ជាប់ពីរាជធានីនៅឧត្តុង្គ ទៅកាន់​តំបន់​សមុទ្រ នៃខេត្តកំពត ។សម្តេចតេជោ ហ៊ុន សែន បានមានប្រសាសន៍ថា ការចុះកិច្ចព្រមព្រៀងពាណិជ្ជកម្មសេរីជាមួយចិននាពេលកន្លង​មក​នេះ​គឺជាឱកាសដ៏ធំសម្រាប់ទីផ្សារកសិផលរបស់កម្ពុជាទៅ​កាន់​ទីផ្សាបរទេស ។ បច្ចុប្បន្ននេះទំនិញផលិតផល និង​កសិ​ផលរបស់កម្ពុជាមួយចំនួនកំពុងត្រូវបានធ្វើការនាំចេញទៅកាន់ទីផ្សាររបស់ប្រទេសចិនរួចទៅហើយ និងកំពុង​ត្រៀមរៀបចំនាំចេញមួយចំនួនទៀតនៅពេលបន្ទាប់ ៕ កំពុងស្វែងរកទិញ-លក់ ឬជួលអចលនទ្រព្យមែនទេ? ពួកយើងអាចជួយលោកអ្នក !

ប្រមុខរាជរដ្ឋាភិបាលនៃព្រះរាជាណាចក្រកម្ពុជានាពេលថ្មីៗនេះទើបតែបានសម្រេចបង្កើតក្រុងថ្មីដូចជា ក្រុងឧដុង្គម៉ែ​ជ័យ (ខេត្ត​កំពង់​ស្ពឺ), ក្រុងអរិយក្សត្រ និងក្រុងសំពៅពូន (ខេត្តកណ្តាល) ដែលត្រូវបានអ្នកជំនាញក្នុងវិស័យ​អចលន​ទ្រព្យ​បាន​លើក​ឡើង​​ថា ក្រុងថ្មីទាំង៣នេះនឹងធ្វើឱ្យតម្លៃអចលនទ្រព្យនឹងស្ទុះឡើងថ្លៃ ។ការបង្កើតក្រុងទាំង៣នេះគឺជាយន្តការរបស់រាជរដ្ឋាភិបាលដើម្បី​ជំរុញ​សេដ្ឋកិច្ចនៅតាមតំបន់​ឱ្យកាន់តែមាន​ភាពទា​ក់​ទាញ និងមានការរីកចម្រើនជាមុន ​ក៏ដូចជាការបង្កើនការផ្តល់សេវា​សាធារណៈ​កាន់តែ​កៀក និងមានប្រសិទ្ធភាព ។ក្នុង​ពេលដែលទីក្រុងថ្មីនេះចាប់ផ្តើមកសាងតម្រូវការដីនឹងមានការកើនឡើងដែលធ្វើឱ្យតម្លៃអចលនទ្រព្យ​កើន​ឡើង ។ ប៉ុន្តែយ៉ាង​ណាការរៀបចំក្រុងថ្មីនេះទាមទារនូវការវិនិ​យោគរបស់រាជរដ្ឋា​ភិបាលក្នុ​ងការកសាង​ហេដ្ឋារចនា​សម្ព័ន្ធ​ឱ្យ​បាន​កាន់តែប្រសើរ​ជាង​មុន​ផងដែរ ។ សម្រាប់ឆ្នាំ២០២៣ តម្លៃដី​អាចនឹងមិនប្រែប្រួលខ្លាំងនោះទេ ដោយសារ​ស្ថាន​ភាពសេដ្ឋកិច្ចមិនសូវល្អ ក៏ដូចជា​បញ្ហា​អូស​បន្លាយនៃសង្រ្គាមអ៊ុយក្រែន ។ តែយ៉ាងណា ចាប់ពីឆ្នាំ២០២៤ និងឆ្នាំ២០២៥ តម្លៃដីអាចនឹងកើនឡើងពី២០% ទៅ​៣០%​នៃតម្លៃ​បច្ចុប្បន្ន ។ នេះបើតាមការឱ្យពីលោក ច្រឹក សុខនីម ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា ។លោក ច្រឹក សុខនីម បានឱ្យដឹងផងដែរថា បច្ចុប្បន្ននេះនៅក្នុងតំបន់អរិយក្សត្រ​អចលនទ្រព្យមាន​តម្លៃ​ចន្លោះ​ពី៨០​ដុល្លារ​ទៅ១៣០ដុល្លារក្នុង​មួយ​ម៉ែត្រការ៉េ សម្រាប់នៅតាមផ្លូវធំៗ និងតាមផ្លូវតូចៗ តម្លៃប្រមាណ​ពី២០​ដុល្លារ​ទៅ​ក្រោម​​៨​០ដុល្លារក្នុងមួយម៉ែត្រការ៉េ ។ ដោយ​ឡែក​នៅ តំបន់ក្រុងឧដុង្គម៉ែជ័យ ក្នុងខេត្តកំពង់ស្ពឺវិញ ជាមធ្យមតម្លៃដី ប្រហាក់ប្រហែលនឹងតំបន់អរិយក្សត្រដែរ ពោលគឺនៅតាម​ផ្លូវ៥១ តម្លៃចន្លោះពី​៧០​ដុល្លារ​ទៅជិត​២០០​ដុល្លារ​ក្នុងមួយ​ម៉ែត្រការ៉េ និងនៅតាមផ្លូវតូចៗ នៅរង្វង់២០ទៅ៣០ដុល្លារ ក្នុងមួយ​ម៉ែត្រ​ការ៉េ ។ក្រុងចំនួន២នៅខេត្តកណ្តាល គឺក្រុងអរិយក្សត្រ ​ត្រូវបានកាត់យកឃុំចំនួន៦ ពីស្រុកខ្សាច់កណ្តាល និងឃុំចំនួន៥ នៅស្រុកល្វាឯម​ ខណៈក្រុងសំពៅពូន ដែលជាប់ព្រំដែនវៀតណាម ត្រូវបានកាត់យកឃុំចំនួន០៥ ពីស្រុកកោះធំ ។ ​ដោយឡែក​ក្រុងឧដុង្គម៉ែជ័យ ស្ថិតក្នុងខេត្តកំពង់ស្ពឺ ត្រូវបានបំបែកចេញពីស្រុកឧដុង្គ ​ដោយកាត់យក​ឃុំចំនួន​៥ពីស្រុក​ឧដុង្គ ​៕ កំពុងស្វែងរកទិញ-លក់ ឬជួលអចលនទ្រព្យមែនទេ? ពួកយើងអាចជួយលោកអ្នក !

រាជធានីភ្នំពេញ ៖ ឯកឧត្តម លឹម ស៊ីដេនីន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញ​ដឹក​នាំ​កិច្ច​ប្រជុំ​ពីការរៀបចំកម្មវិធីប្រកាសបើកការដ្ឋានគម្រោងសាងសង់ស្ពានទន្លេមេគង្គ ខេត្តក្រចេះ និង គម្រោង​លើក​កម្ពស់​​គុណភាពផ្លូវជាតិលេខ៧ (ពីទីប្រជុំជនស្គន់ ដល់ក្រុងកំពង់ចាម) ក្រោមហិរញ្ញប្បទាន សម្បទាន​ពីរដ្ឋាភិបាល នៃសាធារណរដ្ឋប្រជាមានិតចិន ដែលគ្រោងនឹងប្រព្រឹត្តទៅនាដើមខែមករា ឆ្នាំ២០២៣​ខាងមុខ ក្រោមអធិបតីភាព​ដ៏ខ្ពង់​ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជា​ណា​ចក្រកម្ពុជា ដោយមានការ​ចូល​​រួម​​ពីសំណាក់ឯកឧត្តម លោកជំទាវ ជាថ្នាក់ដឹកនាំ និងលោក លោកស្រី ជាមន្ត្រី​ជំនាញ​ពាក់ព័ន្ធ ជាសមាជិក សមាជិកា គណៈកម្មការ និងអនុគណៈកម្មការជាច្រើនរូប ។ កិច្ចប្រជុំនេះធ្វើនាទីស្តីការក្រសួង នាព្រឹកថ្ងៃទី១២ ខែធ្នូ ឆ្នាំ២០២២ ។កិច្ចប្រជុំនេះត្រូវបានរៀបចំឡើងក្នុងគោលបំណងដើម្បីបែងចែកតួនាទី និងភារកិច្ចជូនដល់សមាជិក សមាជិកា​គណៈ​កម្មាការ និងអនុគណៈកម្មការសម្រាប់ត្រៀមរៀបចំកម្មវិធីប្រកាសបើកការដ្ឋាននូវគម្រោងទាំងពីរខាងលើ ដើម្បីឱ្យការដឹកនាំ គ្រប់គ្រង ចាត់ចែង និងសម្របសម្រួលកម្មវិធី អាចប្រព្រឹត្តទៅបាន ដោយរលូន ប្រកបដោយ​សុវត្ថិភាព និងប្រសិទ្ធភាពការងារទៅតាមបំណែងចែកការងារ ដែលមាននៅក្នុងលិខិតបង្គាប់ការ ។អង្គប្រជុំបានពិភាក្សា ផ្លាស់ប្តូរយោបល់យ៉ាងផុសផុល ទៅលើចំណុចសំខាន់ៗនានា ដែលរួមមានដូចជា៖ ការរៀប​ចំ​សុន្ទរក​ថាជូនថ្នាក់ដឹកនាំ ការជ្រើសរើសទីតាំងក្នុងការរៀបចំកម្មវិធី ការរៀបចំលិខិតអញ្ជើញថ្នាក់ដឹកនាំ ភ្ញៀវកិត្តិ​យស​ជាតិអន្តរជាតិ ព្រមទាំងការរៀបចំចងក្រងទិន្នន័យព័ត៌មាន រូបភាព និងវីដេអូ ឯកសារជាដើម ដើម្បីដាក់​ជូន​ទៅ​ខុទ្ទកាល័យ​សម្តេចតេជោ នាយករដ្ឋមន្ត្រី គោរពស្នើសុំគោលការណ៍ ក្នុងការបញ្ចេញខ្លឹមសារផ្សព្វផ្សាយ នៅលើទំព័រ​ហ្វេស​ប៊ុក​ផ្លូវការរបស់សម្តេចផ្ទាល់ ។ឯកឧត្តមរដ្ឋលេខាធិការ ប្រធានអង្គប្រជុំ ក៏បានធ្វើការផ្តាំផ្ញើដល់អនុប្រធានគណៈកម្មការ សមាជិកគណៈកម្មការ និងអនុគណៈកម្មការនីមួយៗ ត្រូវទទួលខុសត្រូវលើភារកិច្ច ស្ថិតក្រោមដែនសមត្ថកិច្ចរបស់ខ្លួន ដែលបានកំណត់ ឱ្យអស់ពីសមត្ថភាព និងលទ្ធភាព ដើម្បីឱ្យការរៀបចំពិធីប្រកាសបើកការដ្ឋានគម្រោងទាំងពីរនេះ អាចសម្រេច​ទៅ​បាន​ប្រកបដោយជោគជ័យ៕ កំពុងស្វែងរកទិញ-លក់ ឬជួលអចលនទ្រព្យមែនទេ? ពួកយើងអាចជួយលោកអ្នក !

ខេត្តកំពត ៖ ឯកឧត្តម ខាន់ ម៉ាណេរ រដ្ឋលេខាធិការ និងជាប្រធានគណៈកម្មការសម្រាប់រៀបចំពិធី​បើកការដ្ឋាន​លើគម្រោង​ធ្វើឱ្យប្រសើឡើងវិញផ្លូវជាតិលេខ៣១ និងលេខ៣៣ ព្រមទាំង ឯកឧត្តម ប៉ាល់ ចន្ទតារា រដ្ឋលេខា​ធិការ​ក្រសួងសាធារណការ និងដឹកជញ្ជូន និងជាប្រធានគ្រប់គ្រងគម្រោង (PMU) ផ្លូវជាតិលេខ៣៣ បានអញ្ជើញ​ចុះ​ពិនិត្យ​​ស្ថានភាពផ្លូវជាតិទាំងពីរខ្សែដឹកនាំដោយ ឯកឧត្តម យូ ស៊ុនឡុង និងឯកឧត្តម ហ៊ុន ស៊ីថា រដ្ឋមន្រ្តី​ប្រតិភូ​អម​នាយក​រដ្ឋមន្រ្តី និងជា នាយករងខុទ្ទកាល័យសម្តេចតេជោនាយករដ្ឋមន្រ្តី សម្រាប់ត្រៀម​រៀបចំបើក​ការ​ដ្ឋាន​សាងសង់ជាផ្លូវការ ។ ការអញ្ជើញចុះត្រួតពិនិត្យនេះធ្វើឡើងកាលពីថ្ងៃទី១២ ខែធ្នូ ឆ្នាំ២០២២ ។ការចុះពិនិត្យនេះធ្វើឡើងក្នុងគោលបំណង ដើម្បីជ្រើសរើសទីតាំង បែងចែកការទទួលខុសត្រូវការងារ ក្នុងការត្រៀម​ប្រារព្ធ​ពិធីបើកការដ្ឋានសាងសង់ជាផ្លូវការ ក្រោមអធិបតីភាពដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ដែល​គ្រោង​​នឹងប្រារព្ធនាពេលឆាប់ៗខាងមុខនេះ ។បន្ទាប់ពីចុះពិនិត្យលើទីតាំងនីមួយៗរួចមក ឯកឧត្តមរដ្ឋមន្ត្រីប្រតិភូទាំងពីរ បានជ្រើសរើយក​ទីតាំង​សម្រាប់​រៀប​ចំពិធី​បើកការ​ដ្ឋាន នៅភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត និងបានបន្តដឹកនាំកិច្ចប្រជុំពិភាក្សា​បែងចែក​តួនាទី និងភារកិច្ចមុនថ្ងៃចាប់ផ្តើម និងថ្ងៃប្រារព្ធពិធីនៅក្នុងកិច្ចប្រជុំ ។ឯកឧត្តមរដ្ឋមន្រ្តីប្រតិភូអមនាយករដ្ឋមន្រ្តីទាំងពីររូប បានថ្លែងអំណរគុណដល់គ្រប់ផ្នែកពាក់ព័ន្ធដែលបានចូលរួម និង​មាន​​ប្រសាសន៍បញ្ជាក់លើកឡើងពីជំហរក្នុងការអនុវត្តការងារ​សូមធ្វើឱ្យមាន​ប្រសិទ្ធភាព​ប្រកប​ដោយកា​រ​ទទួល​ខុស​ត្រូវ​ដើម្បីញ៉ាំងឱ្យពិធីបើកការដ្ឋាននាឱកាសនោះអាចប្រព្រឹត្តិទៅដោយរលូន ៕ កំពុងស្វែងរកទិញ-លក់ ឬជួលអចលនទ្រព្យមែនទេ? ពួកយើងអាចជួយលោកអ្នក !

រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បាន​អញ្ជើញ​ជាអធិបតីក្នុងពិធីប្រគល់ និងទទួលប្រាក់កម្ចីសរុប១,៥ពាន់លានដុល្លារអាមេរិក​សម្រាប់​គាំទ្រ​ការ​អភិវឌ្ឍ​នៅកម្ពុជា ។ ពិធីនេះនឹងធ្វើឡើងនៅវិមានសន្តិភាពនៅព្រឹកថ្ងៃសុក្រ ទី០៩ ខែធ្នូ ឆ្នាំ២០២២ កន្លងទៅនេះ ។ក្រសួងការបរទេស និងសហប្រតិបត្តិការអន្តរជាតិបានឱ្យដឹងថា ពិធីចុះហេត្ថលេខានេះមានចំនួនពីររួមមាន៖ទី១-ការចុះហត្ថលេខាលើកិច្ចសម្របសម្រួលក្របខណ្ឌ ស្ដីពីការផ្ដល់ឥណទានសម្បទាន នៃមូលនិធិសហប្រតិបត្តិ​ការអភិវឌ្ឍន៍​សេដ្ឋកិច្ចសម្រាប់ឆ្នាំ២០២២-២០២៦ ដែលមានទំហំទឹកប្រាក់ចំនួន ១៥០០លានដុល្លារអាមេរិក ។ ឯកសារនេះ ត្រូវចុះហត្ថលេខារវាងឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិ​ការអន្តរជាតិ​កម្ពុជា និងឯកឧត្តម ប៉ាក ហឹងឃ្យង (PARK Heung-kyeong) ឯកអគ្គរដ្ឋទូត នៃសាធារណរដ្ឋកូរ៉េ ប្រចាំកម្ពុជា។ទី២-ការចុះហត្ថលេខាលើគម្រោងពង្រឹងសមត្ថភាពប្រព័ន្ធបណ្ដាញបញ្ជូនអគ្គិសនីនៅខេត្តព្រះសីហនុ ដែលមាន​ទឹក​ប្រាក់​ចំនួន ៧០,០០០,០០០ដុល្លារអាមេរិក និងគម្រោងសាងសង់ស្ពានមិត្តភាពកម្ពុជា-សាធារណរដ្ឋកូរ៉េ (ផ្សារចាស់-ជ្រោយចង្វារ, ជ្រោយចង្វារ-អរិយក្សត្រ) ដែលមានទឹកប្រាក់ចំនួន ២៤៥,៩០៩,០០០ដុល្លារអាមេរិក ។ស្ពានមិត្តភាពកម្ពុជា-សាធារណរដ្ឋកូរ៉េដែលសាងសង់ចាប់ពីផ្សាររាត្រី-ជ្រោយចង្វារ, ជ្រោយចង្វារ – អរិយក្សត្រ គឺសាងសង់ស្ពានចំនួន២នៅទីតាំង «ផ្សាររាត្រី – ជ្រោយចង្វារ និង ជ្រោយចង្វារ – អរិយក្សត្រ» ជាស្ពានប្រភេទខ្សែកាបយោងខ្ពស់ ដោយ​សាង​សង់​ជា៤គន្លង ប្រភេទ A/C, ទទឹងស្ពានមាន​ប្រវែង​សរុប ២៧,៥ ម៉ែត្រ និងទទឹងផ្លូវប្រវែង ២២,៥ ម៉ែត្រ ដែលមានមេដ្យាន៣ម៉ែត្រ និងចិញ្ចើមផ្លូវ ៣ ម៉ែត្រ, ល្បឿន​អតិបរមា ៨០ គ.ម/ម៉ោង ។គម្រោងទាំងពីរនេះចុះហត្ថលេខាដោយឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួង​សេដ្ឋកិច្ច និងហិរញ្ញវត្ថុ និងលោកស្រី Minnie CHEY ប្រធានមូលនិធិសម្រាប់កិច្ចសហប្រតិបត្តិការ​អភិវឌ្ឍន៍​សេដ្ឋកិច្ច នៃធនាគារនីហ័រណអាហ័រណកូរ៉េប្រចាំកម្ពុជា ។ក្រសួងការបរទេសកម្ពុជា បានគូសបញ្ជាក់ ឥណទានសម្បទានដែលផ្ដល់ដោយរដ្ឋាភិបាល នៃសាធារណរដ្ឋ​កូរ៉េ​នាពេល​នេះនឹងចូលរួមចំណែកដ៏សំខាន់ដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការពន្លឿន​ការអភិវឌ្ឍ​សេដ្ឋកិច្ច ព្រមទាំងពង្រឹងបន្ថែមទៀត នូវទំនាក់ទំនងល្អ ដែលមានស្រាប់រវាងប្រជាជាតិទាំងពីរ ៕ កំពុងស្វែងរកទិញ-លក់ ឬជួលអចលនទ្រព្យមែនទេ? ពួកយើងអាចជួយលោកអ្នក !

(រាជធានីភ្នំពេញ, ថ្ងៃទី១៤ ខែធ្នូ ឆ្នាំ២០២២) ៖ Tanncam Investment Pte. Ltd. ដែលជាក្រុមហ៊ុន​មូល​ធន និង​បណ្តាក់​ទុន​ឯកជន មានមូលដ្ឋាននៅប្រទេសសិង្ហបុរី បានធ្វើការបណ្តាក់ទុនជាមួយក្រុមហ៊ុន Digital Classifieds Group (DCG) ដែលជាក្រុមហ៊ុនមានមូលដ្ឋាននៅអូស្ត្រាលី និងជាក្រុមហ៊ុនប្រតិបត្តិករ​ឈាន​មុខគេ​នៃផលប័ត្រ​អចលន​​ទ្រព្យ ​អនឡាញ និងក្រុមហ៊ុនចាត់ថ្នាក់ទូទៅនៅក្នុងទីផ្សារដែល​កំពុង​រីក​ចម្រើន ។ ក្រុមហ៊ុន និងម៉ាកយីហោ​ដែលជា​បុត្រ​សម្ព័ន្ធ ​របស់ DCG រួមមាន ៖ ក្រុមហ៊ុន realestate.com.kh និង FazWaz ដែលស្ថិតនៅក្នុង​ប្រទេស​កម្ពុជា, hausples.com.pg និង marketmeri នៅ Papua New Guinea, yula.la ក្នុងប្រទេសឡាវ និង property.com.fj នៅ Fiji ។ មិនតែប៉ុណ្ណោះ ក្រុមហ៊ុន Cambodian Investment Management បានដើរតួជា​អ្នក​រៀបចំ និងផ្តល់ប្រឹក្សាហិរញ្ញវត្ថុ លើ​ប្រតិបត្តិការ​សម្រាប់​ក្រុមហ៊ុន Tanncam Investment Pte. Ltd ផងដែរ ។នាយកប្រតិបត្តិក្រុមហ៊ុន DCG Group លោក Mathew Care បានមានប្រសាសន៍ថា ៖ «នេះគឺជាពេលវេលា​ដ៏​គួរ​ឱ្យ​រំភើបមួយ ​សម្រាប់ក្រុមនេះ ដោយសារអាជីវកម្មរបស់យើង​ទទួលបានភាពទាក់ទាញ​ឡើងវិញ​ក្រោយស្ថានភាពជម្ងឺ​កូវីដ ហើយយើង​កំពុង​ជួបប្រទះ នឹងកំណើនដ៏រឹងមាំ និងភាពរីកចម្រើន​ រួមនឹងការកែលម្អ​យ៉ាង​ច្រើន​​នៅ​ក្នុង​​មូលដ្ឋាន​គ្រឹះនៃ​​ផលប័ត្រ​របស់យើង ។ យើងស្វាគមន៍ Tanncam ក្នុងនាមជាម្ចាស់ភាគហ៊ុនថ្មី និងជា​អ្នក​វិនិយោគដ៏ល្បីល្បាញ ហើយយើង​រំពឹងថា ពួកគេនឹងក្លាយជាចំណែកដ៏ជោគជ័យមួយ ជាមួយនឹង​គោលបំណងយុទ្ធសាស្រ្ត​នាពេល​អនាគត​របស់​យើង» ។លោក Anthony Galliano, នាយកក្រុមហ៊ុន Tanncam Investment Pte. Ltd. និងជានាយកប្រតិបត្តិនៃក្រុមហ៊ុន Cambodian Investment Management បានមានប្រសាសន៍ថា ៖«យើងជឿថា DCG បានបង្ហាញ​ពីសមត្ថភាព​ពិសេស​មួយ​ក្នុងការចូលទៅក្នុងទីផ្សារប្រកួតប្រជែងដែលកំពុងមានការរីកចម្រើន និងបង្កើតភាព​លេចធ្លោ​មួយផង​ដែរ ។ យើងកំពុងវិនិយោគលើអ្វីដែលយើងជឿថា​ជាអនាគត​ដ៏ជោគជ័យ, ក្រុមគ្រប់គ្រងដ៏រឹងមាំ និងផលប័ត្រ​ដែល​នឹង​​ទទួលបានការរីកចម្រើន ។ ក្រុមហ៊ុននេះកំពុង​ស្ថិតនៅ​លើចំណុច​កំពូលនៃភាពអស្ចារ្យ ហើយយើងរីករាយ​ក្នុងការ​​រួម​ចំណែកក្នុងការធ្វើដំណើររបស់ពួកគេ» ។លោក Anthony នឹងបម្រើការជាក្រុមប្រឹក្សាភិបាល នៃក្រុម Digital Classifieds Group (DCG ដែលស្ថិតក្រោម​ការ​យល់​ព្រមពីបទប្បញ្ញត្តិ) ។------------ អំពីយើង ------------ ក្រុមហ៊ុន Tanncam Investment Pte. Ltd. គឺជាក្រុមហ៊ុនបណ្តាក់ទុនដែលមានមូលដ្ឋាននៅប្រទេសសិង្ហបុរី និងជាក្រុមហ៊ុនភាគហ៊ុន​ឯកជន​ដែលផ្តោតលើការ​ចាប់​ផ្តើមដំណាក់កាលដំបូង និងឱកាសវិនិយោគជាយុទ្ធសាស្រ្ត ។ក្រុមហ៊ុន Digital Classifieds Group បង្កើតឡើងក្នុងឆ្នាំ 2013, DCG ប្រតិបត្តិការផលប័ត្រនៃអចលនទ្រព្យអនឡាញឈានមុខគេ ដែលរីក​លូត​លាស់​លឿន​​​បំផុត​របស់អាស៊ីប៉ាស៊ីហ្វិក ។ DCG បានរួមចំណែកនៅក្នុងទីផ្សារ​ដោយប្រើប្រាស់បច្ចេកវិទ្យា​ដើម្បី​ផ្តល់ភាព​ងាយ​ស្រួលដល់អ្នកប្រើប្រាស់ និងអាជីវកម្មទាំងឡាយដែលសហការមួយពួកយើង ។ ផលប្រយោជន៍ប្រកួត​​ប្រជែង​នៅលើទីផ្សាររបស់យើង គឺវិធីសាស្រ្តដ៏ទូលំទូលាយ​ក្នុងការ​ដោះស្រាយតម្រូវការរបស់​អ្នក​​ប្រើប្រាស់ ហើយ​ការផ្តល់​គុណតម្លៃសម្រាប់អតិថិជនរបស់យើង ។ក្រុមហ៊ុន Cambodian Investment Management Co. Ltd. ជា​ក្រុមហ៊ុន​ហិរញ្ញវត្ថុ​សាជីវកម្ម និង​សេវាកម្ម​អាជីវកម្ម​ដែល​មាន​មូលដ្ឋាន​នៅប្រទេស​កម្ពុជា ។ ត្រូវបាន​បង្កើតឡើង​ក្នុងឆ្នាំ 2009, ក្រុមហ៊ុននេះបានធ្វើការជ្រើសរើសធ្វើជាអ្នករៀបចំ និងអ្នកប្រឹក្សាហិរញ្ញវត្ថុលើការរួមបញ្ចូលគ្នា និងការ​ទិញ​យក និងប្រតិបត្តិការភាគហ៊ុនឯកជន ។CONTACT INFORMATION:   Digital Classifieds Group Pty Ltd                                                   Tanncam Investment Pte. Ltd.Mathew Care CEO & Co-Founder                                                  Anthony Galliano+61 409 598 227                                                                              +85510902535mathew.care@hausples.com.pg                                                  anthonygalliano@tanncam.com

ថ្លែងក្នុងពីធីជួបសំណេះសំណាលជាមួយពលរដ្ឋខ្មែររស់នៅតំបន់អឺរ៉ុប នៅទីក្រុងព្រុចសែល ប្រទេសប៊ែលហ្សិក កាលពីល្ងាចថ្ងៃទី១២ ខែធ្នូ សម្តេចតេជោ ហ៊ុន សែន ប្រកាសថារដ្ឋនឹងសាងសង់ស្ពាន៣បន្ថែមទៀត ដែលស្ពានទាំងនោះនឹងធ្វើឱ្យសេដ្ឋកិច្ច និងបម្រើផលប្រយោជន៍ប្រជាពលរដ្ឋបានច្រើនមួយកម្រិតទៀត ។សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាបានសង្កត់ធ្ងន់ថា រាជរដ្ឋាភិបាលកម្ពុជា នឹងមាន​ការ​សាង​សង់ស្ពាន​ចំនួន៣បន្ថែមទៀតដែលរួមមាន ៖ ទី១-ស្ពានឆ្លងកាត់ទន្លេមេគង្គ​នៅខេត្ត​ក្រចេះ, ទី២-ស្ពានមិត្តភាពកម្ពុជា-កូរ៉េ ពីភ្នំពេញទៅតំបន់អរិយ្សក្សត្រ, និងទី៣-ស្ពាននៅតំបន់ល្វាឯម ជាប់ជាមួយផ្លូវ​ល្បឿន​លឿន​ភ្នំពេញ-បាវិត ។ចំណែកពីធីបើកការដ្ឋានសងសង់ស្ពានឆ្លងទន្លេមេគង់នៅខេត្តក្រចេះអាចនឹងត្រូវធ្វើឡើងនៅថ្ងៃទី២ ឬទី៦ ខែមករា ២០២៣ ខាងមុខ ដោយសារតែសម្តេចតេជោ ហ៊ុន សែន មានភាពមមាញឹកខ្លាំងលើកិច្ចការប្រទេសជាតិ ។ នេះបើតាមការបញ្ជាក់របស់សម្តេច ។សូមបញ្ជាក់ថា កម្មវិធី​ប្រកាស​បើក​ការដ្ឋាន​គម្រោង​សាងសង់​ស្ពាន​ទន្លេមេគង្គខេត្តក្រចេះ ក្រោម​ហិរញ្ញប្បទានសម្បទាន​ពី​រដ្ឋាភិបាល​នៃ​សាធារណរដ្ឋ​ប្រជាមានិត​ចិន ​គ្រោង​នឹង​ប្រព្រឹត្ត​ទៅនា​ដើមខែ​មករា ឆ្នាំ​២០២៣​ខាងមុខ​ក្រោម​អធិបតីភាព​ដ៏​ខ្ពង់ខ្ពស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ។​សម្រាប់គម្រោងសាងសង់ស្ពានមិត្តភាពកម្ពុជា-សាធារណរដ្ឋកូរ៉េចាប់ពីផ្សាររាត្រី-ជ្រោយចង្វារ, ជ្រោយចង្វារ – អរិយក្សត្រ មានទឹកប្រាក់ឥណទានចំនួន ២៤៥ ៩០៩ ០០០ ដុល្លារអាមេរិក វិសាលភាពរបស់គម្រោង គឺសាងសង់ស្ពានចំនួន ២ នៅទីតាំង «ផ្សាររាត្រី – ជ្រោយចង្វារ និង ជ្រោយចង្វារ – អរិយក្សត្រ» ជាស្ពានប្រភេទខ្សែកាបយោងខ្ពស់ ដោយ​សាង​សង់​ជា៤គន្លង ប្រភេទ A/C, ទទឹងស្ពានមានប្រវែងសរុប ២៧,៥ ម៉ែត្រ និងទទឹងផ្លូវប្រវែង ២២,៥ ម៉ែត្រ ដែលមានមេដ្យាន៣ម៉ែត្រ និងចិញ្ចើមផ្លូវ ៣ ម៉ែត្រ, ល្បឿនអតិបរមា ៨០ គ.ម/ម៉ោង និងស្ពានទី៣ គឺភ្ជាប់ពីផ្លូវជាតិលេខ១ ទៅកាន់ស្រុកល្វាឯម ខេត្តកណ្តាល ដែលរាជរដ្ឋាភិបាលត្រូវចំណាយទឹកប្រាក់ប្រមាណ ២០០លានដុល្លារ ។ ស្ពាននេះមានតួនាទីក្នុងការតភ្ជាប់ជាមួយផ្លូវល្បឿនលឿនពីភ្នំពេញទៅបាវិត ខេត្តស្វាយរៀង ។ ការឆ្លងកាត់ស្ពាននេះ មិនតម្រូវឲ្យគិតប្រាក់នោះទេ លើកលែងតែឆ្លងកាត់ផ្លូវល្បឿនលឿនប៉ុណ្ណោះ ដែលត្រូវបង់ប្រាក់ ៕ កំពុងស្វែងរកទិញ-លក់ ឬជួលអចលនទ្រព្យមែនទេ? ពួកយើងអាចជួយលោកអ្នក !

គម្រោងហេដ្ឋារចនាសម្ព័ន្ធផ្លូវល្បឿនលឿនដែលនឹងក្លាយជាផ្លូវល្បឿនលឿនទី២ក្នុងប្រទេសកម្ពុជា តភ្ជាប់​ពីរាជ​ធានីភ្នំពេញទៅកាន់ក្រុងបារវិត ខេត្តស្វាយរៀង ព្រំប្រទល់ប្រទេសវៀតណាម នឹងធ្វើការ​ចុះហត្ថលេខា​នៅដើម​ឆ្នាំ២០២៣​ខាងមុខនេះ ។ នេះបើតាមការបង្ហើបឱ្យដឹងពីឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ។ឯកឧត្តម ស៊ុន ចាន់ថុល បានឱ្យដឹងកាលពីពេលថ្មីៗនេះថា អន្តរក្រសួង និងភាគីពាក់ព័ន្ធបានធ្វើការប្រជុំពិភាក្សានៅ​លើ​ចំណុច​សំខាន់ៗមួយចំនួនដើម្បីដោះស្រាយលើបញ្ហានានា និងធ្វើយ៉ាងណាឱ្យសេចក្តីព្រាងនៃកិច្ចសន្យាភាពជា​ដៃគូរវាងរដ្ឋ និងឯកជនមានខ្លឹមសារគ្រប់ជ្រុងជ្រោយដើម្បីអាចអនុវត្តការងារសាងសង់ផ្លូវល្បឿនលឿនភ្នំពេញ-បាវិតទៅបានដោយរលូន ។រដ្ឋមន្ត្រីក្រសួងសាធារណការ និងដឹកជញ្ជូន ក៏បានបញ្ជាក់ផងដែរថា ក្រោយជួបប្រជុំពិភាក្សារួចមកភាគីពាក់ព័ន្ធទាំង​បានសម្រេចឯកភាពស្របទៅតាមខ្លឹមសារនៃសេចក្តីព្រាង និងកិច្ចសន្យាខាងលើរួមហើយ នៅរងចាំតែការចុះហត្ថ​លេខា​ក្រោមអធិបតីភាពថ្នាក់ដឹកនាំកំពូលនៃប្រទេសទាំងពីរ កម្ពុជា-ចិន នាដើមឆ្នាំ២០២៣ ខាងមុខតែប៉ុណ្ណោះ ។គម្រោងសាងសង់ផ្លូវល្បឿនលឿនភ្នំពេញ-បាវិត ដែលជាផ្លូវល្បឿនលឿនទី២របស់កម្ពុជា​បន្ទាប់​ពីផ្លូវ​ល្បឿន​លឿន​ភ្នំពេញ-ព្រះសីហនុ គឺជាខ្សែផ្លូវថ្មីទាំងស្រុង មានប្រវែងសរុ​ប​ប្រមាណជា​១៣៨គ.ម ដោយផ្តើមចេញពីរាជធានី​ភ្នំពេញ​ត្រង់ចំណុចផ្លូវក្រវាត់ក្រុងទី៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាម ៕ កំពុងស្វែងរកទិញលក់ ឬជួលអចលនទ្រព្យមែនទេ? ពួកយើងអាចជួយអ្នកបាន !

រាជធានីភ្នំពេញ ៖ ឯកឧត្តម សួង ហេង រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញ​ដឹកនាំ​កិច្ច​ប្រជុំ​គណៈកម្មការសម្រាប់ត្រៀមរៀបចំពិធីសម្ពោធបើកឱ្យប្រើប្រាស់ជាផ្លូវការ ផ្លូវខេត្តលេខ១៤៦បេ និង ផ្លូវ​ខេត្ត​លេខ​១៤៨ ដែលមានប្រវែងសរុបប្រមាណ៤៣,០២គីឡូម៉ែត្រ ស្ថិតនៅក្នុងខេត្តព្រះសីហនុ ដោយមាន​ការអញ្ជើញ​ចូលរួមផងដែរពីសំណាក់ថ្នាក់ដឹកនាំក្រសួង និងមន្ត្រីជំនាញពាក់ព័ន្ធជាច្រើនរូប។កិច្ចប្រជុំនេះត្រូវបានរៀបចំឡើងក្នុងគោលបំណងដើម្បី ធ្វើការបែងចែកតួនាទី និងភារកិច្ចជូនដល់សមាជិក​សមាជិកា​​នៃគណៈកម្មាការ និងអនុគណៈកម្មការសម្រាប់ត្រៀមរៀបចំពិធីសម្ពោធ ដើម្បីឱ្យការដឹកនាំ គ្រប់គ្រង ចាត់ចែង និងសម្របសម្រួលកម្មវិធីខាងលើ ប្រព្រឹត្តិទៅបានដោយរលូន ប្រកបដោយសុវត្ថិភាព និងប្រសិទ្ធភាពការងារទៅតាមបំណែងចែកការងារ ដែលមានចែងនៅក្នុងលិខិតបង្គាប់ការ។អង្គប្រជុំបានធ្វើការពិភាក្សា ផ្លាស់ប្តូរយោបល់ យ៉ាងផុសផុល ទៅលើចំណុចសំខាន់ៗនានា ដែលរួមមានដូចជា៖ ចំណងជើងកម្មវិធី ការរៀបចំសន្ទរកថាជូនថ្នាក់ដឹកនាំ របៀបវារៈនៃកម្មវិធី ការរៀបចំលិខិតអញ្ជើញថ្នាក់ដឹកនាំ និងភ្ញៀវកិត្តិយសជាដើម។ឯកឧត្តមរដ្ឋលេខាធិការ ប្រធានអង្គប្រជុំ ក៏បានធ្វើការផ្តាំផ្ញើរដល់អនុប្រធានគណៈកម្មការ សមាជិកគណៈកម្មការ និងអនុគណៈកម្មការនីមួយៗ ត្រូវទទួលខុសត្រូវលើភារកិច្ច ស្ថិតក្រោមដែនសមត្ថកិច្ចរបស់ខ្លួន ដែលបានកំណត់ ឱ្យអស់ពីសមត្ថភាព និងលទ្ធភាព។សូមជម្រាបជូនដែរថា៖ ពិធីសម្ពោធបើកឱ្យប្រើប្រាស់ជាផ្លូវការផ្លូវខេត្តលេខ១៤៦បេ និងផ្លូវខេត្តលេខ១៤៨ ប្រវែងសរុប៤៣,០២គីឡូម៉ែត្រ គ្រោងនឹងប្រព្រឹត្តទៅនៅថ្ងៃទី២២ ខែធ្នូ ឆ្នាំ ២០២២ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕ កំពុងស្វែងរកទិញលក់ ឬជួលអចលនទ្រព្យមែនទេ? ពួកយើងអាចជួយអ្នកបាន !

រាជធានីភ្នំពេញ ៖ របាយការណ៍របស់ធនាការពិភពលោកបានចេញផ្សាយនិយាយថា សេដ្ឋកិច្ចរបស់ប្រទេសកម្ពុជាកំពុងងើបឡើងវិញបានល្អបន្ទាប់ពីការផ្ទុះជំងឺ​កូវីដ-១៩ ប៉ុន្តែកត្តាអវិជ្ជមាននានាដែលកំពុងកើតឡើងលើសកលលោក អាចបង្កហានិភ័យដល់ទស្សនវិស័យវិជ្ជមានសម្រាប់កំណើនក្នុងរយៈពេលប៉ុន្មានខែនា​ពេល​ខាងមុខ ។នៅក្នុងរបាយការណ៍បច្ចុប្បន្នភាពសេដ្ឋកិច្ចកម្ពុជាសម្រាប់ខែធ្នូ ឆ្នាំ២០២២ ធនាគារពិភពលោកព្យាករថា កម្ពុជាមានកំណើនសេដ្ឋកិច្ច៤,៨ភាគរយ នៅក្នុងឆ្នាំ២០២២ ក្នុងនោះការងើបឡើងវិញនៃសេដ្ឋកិច្ចក្រោយសម័យមានជំងឺរាតត្បាតមានសន្ទុះកើនឡើងមួយផ្នែកដោយសារការស្ទុះងើបឡើងវិញនៃវិស័យទេសចរណ៍ ។ឧស្សាហកម្មកាត់ដេរ ទំនិញធ្វើដំនើរ និងការនាំចេញស្បែកជើងរបស់កម្ពុជានៅរក្សាបានភាពស្វិតស្វាញរបស់ខ្លួន ។ វិស័យសេវាកម្ម ជាពិសេសផ្នែកធ្វើដំណើរ និងទេសចរណ៍មានដំណើរការបានល្អក្រោយពេលរដ្ឋាភិបាលដាក់ចេញនូវយុទ្ធសាស្ត្រ «រស់នៅជាមួយកូវីដ-១៩» នាចុងឆ្នាំ២០២១ ហើយចំនួនសរុបនៃការមកដល់របស់ភ្ញៀវអន្តរជាតិបានកើនឡើងជាលំដាប់រហូតដល់ទៅ១,២លាននាក់ក្នុងរយៈពេលបួនខែដំបូងនៃឆ្នាំ២០២២ ។ ទំនុកចិត្តរបស់ធុរកិច្ច និងអ្នកប្រើប្រាស់បានកើនឡើង អមដោយការកើនឡើងនៃការវិនិយោគក្នុងប្រទេស និងពីក្រៅប្រទេសផងដែរ ។កំណើនសេដ្ឋកិច្ចត្រូវបានព្យាករថានឹងកើន៥,២ភាករយនៅឆ្នាំ២០២៣ ព្រោះថាកំណើននៃការជួលមនុស្សធ្វើការនឹងកាន់តែជួយដល់ការកើនឡើងនៃការទទួលទានប្រើប្រាស់ក្នុងស្រុក អមដោយការធ្លាក់ចុះនៃអតិផរណា ។ ទោះជាយ៉ាងណាក៏ដោយ ទស្សនវិស័យសម្រាប់មានកំណើនលឿនជាងនេះ នៅប្រឈមមុខនឹងហានិភ័យធ្ងន់ធ្ងរដោយសារតែការវិវត្តសភាពការណ៍នៅក្រៅព្រំដែនរបស់កម្ពុជា ។កម្ពុជាមានសេដ្ឋកិច្ចទំហំតូច ដែលបើកចំហចំពោះការធ្វើពាណិជ្ជកម្មនៅខាងក្រៅ និងការវិនិយោគពីបរទេស ហើយទស្សនវិស័យកំណើនពិភពលោក នៅមានសភាពអាប់អួរ។ កំណើនពាណិជ្ជកម្មសកល បានថយចុះនៅឆមាសទីពីរនៃឆ្នាំ២០២២ ហើយត្រូវបានព្យាករថា នឹងថយចុះយ៉ាងខ្លាំងនៅឆ្នាំ២០២៣។ សេដ្ឋកិច្ចនៃប្រទេសកំពុងអភិវឌ្ឍន៍ដូចជា កម្ពុជាងាយរងគ្រោះណាស់ ជាពិសេសនៅពេលអតិផរណាកើន, ពិភពលោកមានកំណើនសេដ្ឋកិច្ចយឺត, ការផ្គត់ផ្គង់ថាមពលធ្លាក់ចុះ និងអត្រាការប្រាក់ឡើងកាន់តែខ្ពស់។វិស័យផលិតកម្មរបស់កម្ពុជា ពឹងផ្អែកលើទីផ្សារនាំចេញដើម្បីរីកចម្រើន ហើយវានឹងរងផលប៉ះពាល់ជាអវិជ្ជមានខ្លាំង កាលណាកំណើនយឺតៗ កាន់តែអូសបន្លាយពេលនៅក្នុងទីផ្សារនាំចេញដ៏ធំបំផុតពីររបស់ខ្លួន គឺសហរដ្ឋអាមេរិក និងសហភាពអឺរ៉ុប។ ដូចគ្នានេះដែរ ការវិនិយោគនិងលំហូរមូលធនទំនងជានឹងថយចុះ ដោយសារការធ្លាក់ចុះបន្តិចម្តងៗ នូវទុនពីប្រទេសចិន ដែលជាប្រភពនៃការវិនិយោគផ្ទាល់ ពីបរទេសធំបំផុតរបស់កម្ពុជាមកទល់ពេលនេះ។លោកស្រី ម៉ារៀម ស័រមែន នាយិកាធនាគារពិភពលោកប្រចាំប្រទេសមីយ៉ាន់ម៉ា កម្ពុជា និងឡាវ បានថ្លែងថា ដើម្បីការពារសេដ្ឋកិច្ចរបស់ខ្លួនពីផលប៉ះទង្គិចពីការធ្លាក់ចុះ នៃតម្រូវការនៅក្រៅប្រទេស កម្ពុជាគួរចាត់វិធានការដើម្បីពង្រឹងជំហរសារពើពន្ធរបស់ខ្លួន និងលើកកម្ពស់សេដ្ឋកិច្ចក្នុងស្រុក ជាពិសេសឧស្សាហកម្មទេសចរណ៍ដ៏ទាក់ទាញរបស់ខ្លួនសម្រាប់ពិភពលោក។លោកស្រី ស័រមែន បានថ្លែងបន្តថា «ប្រាក់ចំណូលបានកើនឡើង ដោយសារការស្ទុះងើបឡើងវិញនៃសេដ្ឋកិច្ច និងភាពប្រសើរឡើងនៃផ្នែករដ្ឋបាល។ ការពង្រីកមូលដ្ឋានពន្ធនឹងជួយធានាបាននូវធនធានចាំបាច់សម្រាប់លើកកម្ពស់សេដ្ឋកិច្ចរបស់ប្រទេសកម្ពុជា និងសម្រាប់ទប់ទល់សភាពការណ៍នៅពេលមានការធ្លាក់ចុះសេដ្ឋកិច្ចក្នុងចំណោមដៃគូពាណិជ្ជកម្មធំៗ។ វិស័យទេសចរណ៍ និងបដិសណ្ឋារកិច្ច គឺជាផ្នែកដ៏មានសក្ដានុពលសម្រាប់កំណើនទៅថ្ងៃមុខ»។ឆ្ពោះទៅអនាគតវែងឆ្ងាយ សេដ្ឋកិច្ចរបស់កម្ពុជាត្រូវបានគេរំពឹងថា នឹងបន្តឈានទៅដល់អត្រាកំណើនប្រហែល ៦ភាគរយ នៅពេលដែលទេសចរណ៍អន្តរជាតិ និងក្នុងស្រុកបង្កើនអនុភាពកាន់តែរឹងមាំ។ ការចូលរួមរបស់កម្ពុជា នៅក្នុងកិច្ចព្រមព្រៀងពាណិជ្ជកម្ម ដែលបានចុះហត្ថលេខាកាលពីពេលថ្មីៗនេះ ក៏អាចជំរុញវិស័យកសិកម្ម និងឧស្សាហកម្មកែច្នៃកសិផល ឲ្យកាន់តែមានសន្ទុះឡើងទៀតដែរ។ផ្នែកផ្តោតពិសេសនៃរបាយការណ៍នេះ បានពិនិត្យមើលផលប៉ះពាល់នៃអតិផរណាទៅលើភាពក្រីក្រ។ ផ្នែកនេះរំលេចពីតម្រូវការ ដើម្បីការពារជនងាយរងគ្រោះបំផុត ជាមួយគ្នានឹងការពង្រីកកម្មវិធីគាំពារសង្គម បណ្តោះអាសន្ន ដែលបានកំណត់គោលដៅយ៉ាងប្រុងប្រយ័ត្ន។ របាយការណ៍បច្ចុប្បនភាពសេដ្ឋកិច្ចកម្ពុជា ផ្តោតសំខាន់លើការវិវត្តនៃស្ថានភាពម៉ាក្រូសេដ្ឋកិច្ច ក្នុងរយៈពេលខ្លី និងមធ្យម ហើយចេញផ្សាយពីរដងក្នុងមួយឆ្នាំ៕ កំពុងស្វែងរកទិញលក់ ឬជួលអចលនទ្រព្យមែនទេ? ពួកយើងអាចជួយអ្នកបាន !

ចូលរួមកម្មវិធីពានរង្វាន់អចលនទ្រព្យកម្ពុជាឆ្នាំ 2023 និងព្រឹត្តិការណ៍​មួយនៃ​ព្រឹត្តិការណ៍​អចលនទ្រព្យ​ដ៏​មាន​​កិត្យានុភាពបំផុតប្រចាំឆ្នាំ ។ ដោយមានអ្នកជំនាញ និងអ្នក​អភិវឌ្ឍន៍អចលនទ្រព្យ​ឈានមុខ​គេ​ជា​ច្រើន​​​ចូលរួម ហើយម្ចាស់ឧបត្ថម្ភព្រឹត្តិការណ៍ពានរង្វាន់អចលនទ្រព្យកម្ពុជា​ប្រចាំឆ្នាំ202​3​នេះនឹង​ទទួល​បាន​ឱកាសនៃការចូលរួម និងបង្កើតទំនាក់ទំនងជាមួយអ្នកវិនិយោគដែលអភិវឌ្ឍន៍រាប់ពាន់លានដុល្លារ​ក្នុង​អចលន​ទ្រព្យ​ជាមួយ​គម្រោងរបស់ពួកគេជារៀងរាល់ឆ្នាំ ហើយកំពុងបន្តស្វែងរកកិច្ចសន្យាថ្មី អ្នកផ្គត់​ផ្គង់ និងសេវាកម្មពាក់ព័ន្ធ ។ឧបត្ថម្ភកម្មវិធីពានរង្វាន់អចលនទ្រព្យកម្ពុជាប្រចាំឆ្នាំ2023តាមរយៈការឧបត្ថម្ភកម្មវិធី Cambodia Real Estate Awards 2023 (CREA2023) ម្ចាស់ឧបត្ថម្ភព្រឹត្តិការណ៍នេះ​នឹងអាចភ្ជាប់ឈ្មោះរបស់ក្រុមហ៊ុនដោយផ្ទាល់ទៅនឹងព្រឹត្តិការណ៍ដ៏មានកិត្យានុភាពនេះ ។បេសកកម្មរបស់ CREA គឺដើម្បីទទួលស្គាល់សមិទ្ធិផលដែលសម្រេចបាន​នៅក្នុង​វិស័យអចលនទ្រព្យ​កម្ពុជា​ប្រកប​ដោយវត្ថុបំណង មិនលំអៀង និងផ្អែកលើមូលដ្ឋានច្បាស់លាស់ ។ ជាមួយនឹងឱកាសនៃការឧបត្ថម្ភមានកំណត់ ដូច្នេះកុំឱ្យរំលងឱកាសភ្ជាប់ម៉ាកយីហោរបស់លោកអ្នកដោយផ្ទាល់ជាមួយ CREA ។ពានរង្វាន់នេះនឹងមានសម្រាប់ភ្នាក់ងារអចលនទ្រព្យ, ក្រុមហ៊ុនវាយតម្លៃ, ក្រុមហ៊ុនគ្រប់គ្រងអចលនទ្រព្យ, អ្នកអភិវឌ្ឍន៍ និងការអភិវឌ្ឍន៍ទូទាំងប្រទេស ។ នេះនឹងផ្តល់ការទទួលស្គាល់​ដល់ក្រុមហ៊ុនទាំងនោះ​នៅក្នុងវិស័យ​អចលនទ្រព្យ ដោយសារតែពានរង្វាន់ដ៏មានកិត្យានុភាពនេះត្រូវបានទទួលជាផ្លូវការពីសំណាក់ក្រសួងពាក់ព័ន្ធ និងអ្នកជំនាញដែលឈានមុខគេនៅក្នុងវិស័យអចលនទ្រព្យ ។តាមរយៈការបង្ហាញម៉ាកយីហោរបស់អ្នកដោយផ្ទាល់ជាមួយព្រឹត្តិការណ៍ដ៏មានកិត្យានុភាពនេះ លោកអ្នកដែលជា​អ្នក​ឧបត្ថម្ភ​កម្ម​វិធី​អាចទទួល​បាន​អត្ថ​ប្រយោជន៍​តាមរយៈយុទ្ធនាការផ្សព្វផ្សាយពាណិជ្ជកម្មមុន និងក្រោយ​ព្រឹត្តិ​ការណ៍​​ពានរង្វាន់អចលនទ្រព្យកម្ពុជាប្រចាំឆ្នាំ2023ជាច្រើន ។ មិនតែប៉ុណ្ណោះ ក្នុងពិធីទទួលស្វាគមន៍ភ្ញៀវ​កិត្តិយស​ដែល​បាន​អញ្ជើញចូលរួម និងពិធីសំណេះសំណាល​ជួបជុំអាហារ​ពេលល្ងាច​ ម៉ាកយីហោរបស់​លោកអ្នកដែល​ជាអ្នក​ឧបត្ថម្ភ​នឹងបង្ហាញ​ទៅកាន់មនុស្សគ្រប់គ្នា ។ព្រឹត្តិការណ៍ពានរង្វាន់អចលនទ្រព្យប្រចាំឆ្នាំ2023នេះនឹងត្រូវចាក់ផ្សាយនៅទូទាំងទូរទស្សន៍ជាតិ ផ្សាយផ្ទាល់​លើទំព័រ​ហ្វេសប៊ុក Cambodia Real Estate Award ក៏ដូចជាទំព័រហ្វេសប៊ុកដៃគូសហការសំខាន់ៗរួមមាន ៖ Realestate.com.kh, B2B Cambodia, Freshnews និងផ្សេងៗជាច្រើនទៀត ។ប្រសិនបើលោកអ្នកមានចំណាប់អារម្មណ៍ចង់ចូលរួមផ្តល់រង្វាន់ ឬក្លាយជាអ្នកឧបត្ថម្ភនៃពានរង្វាន់ សូមចុចលើតំណភ្ជាប់ទៅកាន់គេហទំព័រផ្លូវការខាងក្រោម ឬទំនាក់ទំនងមកកាន់សហការីយើងខ្ញុំដូចខាងក្រោម ។ឈ្វេងយល់បន្ថែមអំពី CREA 2023សម្រាប់ព័ត៌មានបន្ថែមនៃការចូលរួម CREA 2023 សូមទំនាក់ទំនង ៖ផ្នែកពានរង្វាន់សម្រាប់អ្នកអភិវឌ្ឍន៍ និងការអភិវឌ្ឍ (ភាសាខ្មែរ & អង់គ្លេស) ៖Name: Ms. Annabelle Vong (Anna)Position: Event - Sales ManagerEmail: annabelle.vong@realestate.com.khPhone: +855 (0) 17 426 797 Chinese:Name: Ms. Muyngy Taing (Muyngy)Position: CREA Developers & Development Entry Facilitator & REAKH Relationship ManagerEmail: muyngy.taing@realestate.com.khPhone: +855 (0) 10 723 379 ផ្នែកពានរង្វាន់សម្រាប់ភ្នាក់ងារ  (ភាសាខ្មែរ & អង់គ្លេស) ៖ Name: Ms. Sokphea Rorm (Phea)Position: CREA Agent Entry Facilitator & REAKH Relationship ManagerEmail: sokphea.rorm@realestate.com.khPhone: +855 (0) 81 921 707 / (0) 89 428 028Chinese:Name: Ms. Muyngy Taing (Muyngy)Position: CREA Agent Entry Facilitator & REAKH Relationship ManagerEmail: muyngy.taing@realestate.com.khPhone: +855 (0) 10 723 379 ផ្នែកម្ចាស់ឧបត្ថម្ភពានរង្វាន់អចលនទ្រព្យកម្ពុជា ៖ Name: Ms. Annabelle Vong (Anna)Position: Event - Sales ManagerEmail: annabelle.vong@realestate.com.khPhone: +855 (0) 17 426 797

រាជធានីភ្នំពេញ ៖ ឯកឧត្តម កឹម ស៊ីថន រដ្ឋលេខាធិការប្រចាំក្រសួងពាណិជ្ជកម្មបានជួបពិភាក្សាការងារជាមួយឯកឧត្តម Mohamad SSHS Alhajri ដែលជាឯកអគ្គរាជទូតតែងតាំងថ្មីនៃរដ្ឋកូវ៉ែតប្រចាំព្រះរាជាណាចក្រកម្ពុជាស្តីអំពីការលើកក​ម្ពស់​កិច្ចសហប្រតិបត្តិការក្នុងវិស័យពាណិជ្ជកម្ម វិនិយោគ វិស័យពាក់ព័ន្ធការផ្គត់ផ្គង់ថាមពលប្រេងឥន្ទនៈ និងការ​សាង​សង់ផ្លូវល្បឿនលឿន ព្រមទាំងវិស័យហិរញ្ញវត្ថុ​ ផងដែរ ។ ជំនួបនេះធ្វើឡើងកាលពីថ្ងៃទី៣០ ខែវិច្ឆិកា ឆ្នាំ២០២២ ។ឯកឧត្តម កឹម ស៊ីថន រដ្ឋលេខាធិការប្រចាំការក៏បានលើកឡើងថា ការធ្វើពិពិធ​កម្ម​ទីផ្សារ​នាំចេញ​តាមរយៈ​កិច្ចព្រម​ព្រៀង​ពាណិជ្ជកម្មសេរីក្នុងក្របខណ្ឌទ្វេភាគីនិងអាស៊ាន តំបន់សេដ្ឋកិច្ចពិសេស និងគម្រោងហេដ្ឋា​រចនា​សម្ព័ន្ធ​រូប​វ័ន្តសំខាន់ៗដូចជា ព្រលានយន្តហោះ និងកំពង់ផែទឹកជ្រៅ គឺជាច្បាប់គោលនយោបាយសំខាន់ៗ និងហេដ្ឋា​រចនា​សម្ព័ន្ធ​រូបវ័ន្តថ្មីៗ ដែលបម្រើដល់សកម្មភាពធុរកិច្ច និងវិនិយោគនៅកម្ពុជា ។លើសពីនេះ ឯកឧត្តម Mohamad S SH S Alhajri ក៏បានស្នើឱ្យប្រទេសទាំងពីរបន្តអនុវត្ត និងប្រើប្រាស់កិច្ច​ព្រម​ព្រៀង និងអនុស្សរណៈនៃការយោគយល់គ្នាដែលមានស្រាប់ឱ្យអស់ពីលទ្ធភាព ដើម្បីជំរុញ​កិច្ចសហ​ប្រតិបត្តិ​ការ​ក្នុងគ្រប់វិ​ស័យឱ្យកាន់តែស៊ីជម្រៅបន្ថែមទៀត។ ឯកឧត្តមបានស្នើឱ្យពិនិត្យលទ្ធភាពរៀបចំពិព័រណ៍ពាណិជ្ជកម្ម និង​វេទិកា​​​ធុរកិច្ចរួមគ្នា ដែលអាចជួយបង្កើនទំហំពាណិជ្ជកម្មនិងវិនិយោគទ្វេភាគីឱ្យកាន់តែល្អប្រសើរ ។បច្ចុប្បន្នទំហំពាណិជ្ជកម្មទ្វេភាគីកម្ពុជា-កូវ៉ែត សម្រេចបានប្រមាណ ៦៤ ម៉ឺនដុល្លារអាមេរិក គិតត្រឹម​ខែតុលា ឆ្នាំ២០២២ លើមុខទំនិញសំខាន់ៗ ដូចជា សម្លៀកបំពាក់និងវាយនភណ្ឌ ថ្នាំជក់ ផលិតផលធ្វើដំណើរ ម៉ាស៊ីន​ និងឧបករណ៍អគ្គីសនី ប៉ូលីមែរនៃអេទីឡែន កែវ និងវត្ថុធ្វើពីកែវជាដើម ៕ កំពុងស្វែងរកទិញលក់ ឬជួលអចលនទ្រព្យមែនទេ? ពួកយើងអាចជួយអ្នកបាន !

រាជធានីភ្នំពេញ ៖ ឯកឧត្តម លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញ​ដឹកនាំ​កិច្ចប្រជុំ​ពិភាក្សា​លើក​ទី១ នៃគម្រោងសាងសង់ស្ពានឆ្លងទន្លេមេគង្គត្រង់ខេត្តក្រចេះ និងផ្លូវតភ្ជាប់ពីផ្លូវជាតិលេខ៧ (រង្វង់មូលខ្លាស្ទុះ) ទៅផ្លូវ​ជាតិលេខ៦០B ដោយមានការចូលរួមពីថ្នាក់ដឹកនាំអង្គភាពគ្រប់គ្រង និងអនុវត្តគម្រោង តំណាង​ក្រុមហ៊ុន​សំណង់​សៀងហៃ (SCG) តំណាងក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន និងមន្ត្រីជំនាញ​ពាក់​ព័ន្ធ​​ជាច្រើន​រូបផង​ដែរ ។ កិច្ចប្រជុំនេះធ្វើឡើងនាទីស្ដីការក្រសួង កាលពីថ្ងៃទី២៨ ខែវិច្ឆិកា ឆ្នាំ២០២២ កន្លងទៅនេះ ។កិច្ចប្រជុំនេះរៀបចំឡើងក្នុងគោលបំណងចំនួន៣ធំៗរួមមាន ៖ទី១)- ណែនាំសមាសភាពក្រុមការងារក្រសួងសាធារណការ និងដឹកជញ្ជូន ទៅ​​កាន់​ក្រុមការងារបច្ចេកទេសក្រុមហ៊ុន​សំណង់​សៀងហៃ (SCG) និងក្រុមហ៊ុនទីប្រឹក្សាបច្ចេកទេស ដើម្បីអនុញ្ញាត​ឱ្យ​ក្រុមការងារទាំងអស់បង្កើតទំនាក់ទំនង និងសហការបានរលូនប្រកបដោយប្រសិទ្ធភាពទី២)- ធ្វើបទបង្ហាញពីលទ្ធផលនៃការសិក្សាគម្រោងសាងសង់ស្ពានទន្លេឆ្លងមេគង្គ ត្រង់ខេត្តក្រចេះ និងផ្លូវតភ្ជាប់​ដោយ​តំណាង​ក្រុមហ៊ុនសាងសង់ទី៣)- បំណែងចែកក្រុមការងារបណ្តោះអាសន្នសម្រាប់ដោះស្រាយការងារបន្ទាន់ ការរៀបចំឯកសារផ្សេងៗ និងការស្វែងរកទីតាំងសមស្របសម្រាប់ពិធីបើកការដ្ឋានសាងសង់ស្ពានឆ្លងទន្លេមេគង្គនាពេលឆាប់ៗខាងមុខនេះ។សូមជម្រាបជូនថា គម្រោងសាងសង់ស្ពានឆ្លងទន្លេមេគង្គ និងផ្លូវតភ្ជាប់នេះ មានប្រវែងសរុប៣៣,៤៥ គីឡូម៉ែត្រ តភ្ជាប់ពីផ្លូវជាតិលេខ៧ (រង្វង់មូលខ្លាស្ទុះ) ទៅផ្លូវជាតិលេខ៦០B ដោយក្នុងនោះ​ត្រូវសាង​សង់​ស្ពាន​ឆ្លងកាត់​ទន្លេ​មេគង្គ​ប្រវែង ១៧៦១ម៉ែត្រ មានមុខកាត់ទទឹង១៣,៥ម៉ែត្រ ដែលត្រើយខាងកើតស្ថិតត្រង់ ភូមិបុស្សលាវលើ ឃុំ​បុស​លាវ ស្រុកចិត្របុរី និងត្រើយខាងលិចត្រង់ភូមិព្រែកព្រលូង ឃុំសោប ស្រុកព្រែកប្រសព្វ ខេត្តក្រចេះ ។ចំណែក​ឯផ្លូវ​តភ្ជាប់​​មានប្រវែង១៥,៤៩គីឡូម៉ែត្រ និងផ្លូវខ្នែងក្នុងក្រុងក្រចេះប្រវែង១៦,២០គីឡូម៉ែត្រ គ្រោងនឹង​បើក​ការ​ដ្ឋា​ន​​​​នា​ពេល​​ឆាប់ៗខាងមុខ ដែលគម្រោងនេះនឹងចំណាយថវិកាសរុបប្រមាណ ១១១,៩៨លានដុល្លាសហរដ្ឋ​អាមេរិក ជា​ហិរញ្ញប្បទាន​ពីសាធារណរដ្ឋប្រជាមានិតចិន ដោយប្រើពេលសាងសង់ប្រមាណ ៤២ខែ អនុវត្តដោយ​ក្រុមហ៊ុន​សំណង់​សៀងហៃ (SCG) និងត្រួតពិនិត្យគុណភាពដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន ៕ កំពុងស្វែងរកទិញលក់ ឬជួលអចលនទ្រព្យមែនទេ? ពួកយើងអាចជួយអ្នកបាន !

ក្រុមហ៊ុនអចលនទ្រព្យឈានមុខគេ Realesestate.com.kh មានមោទកភាពសូមជម្រាបជូនដល់សាធារណជន​ទាំង​អស់​ឱ្យបានជ្រាបថា ពានរង្វាន់អចលនទ្រព្យប្រចាំឆ្នាំ (CREA 2023) លើកទី4 ចាប់ផ្តើមបើកហើយ ។ ព្រឹត្តិការណ៍​​​ជួបជុំអាហារពេលល្ងាច (Gala Dinner) នឹងត្រូវធ្វើឡើងនៅខែមេសា ឆ្នាំ2023 ដើម្បីទទួលស្គាល់ និងអបអរលទ្ធផលជាមួយនឹងសមិទ្ធិផលដ៏លេចធ្លោរបស់អ្នកទទួលពានរង្វាន់នៅក្នុងវិស័យអចលនទ្រព្យនៅកម្ពុជា ។ពានរង្វាន់ CREA 2023 ត្រូវបានបែងចែកដូចខាងក្រោម ៖អ្នកអភិវឌ្ឍន៍អចលនទ្រព្យឆ្នើម / ពានរង្វាន់សម្រាប់ការអភិវឌ្ឍពានរង្វាន់សម្រាប់ភ្នាក់ងារឆ្នើមពានរង្វាន់កិត្តិនាមអចលនទ្រព្យអត្ថប្រយោជន៍នៃការចូលរួម CREA 2023ពានរង្វាន់អចលនទ្រព្យកម្ពុជាគឺជាព្រឹត្តិការណ៍ដ៏មានកិត្យានុភាពសម្រាប់អបអរសាទរនូវសមិទ្ធិផលដ៏ល្អបំផុតក្នុងវិស័យអចលនទ្រព្យដែលកំពុងរីកចម្រើនក្នុងប្រទេសកម្ពុជា ។ ការចូលរួមក្នុងពានរង្វាន់អចលនទ្រព្យកម្ពុជា CREA 2023 អាចធ្វើឱ្យភ្នាក់ងារ និងអ្នកអភិវឌ្ឍន៍អចលនទ្រព្យទាំងអស់​ក្លាយជាសមាជិក​ដែលត្រូវបានគេទទួលស្គាល់ និងទុកចិត្តសម្រាប់វិស័យអចលនទ្រព្យក្នុងប្រទេសកម្ពុជា ។ ម្ចាស់ពានរង្វាន់ និងបេក្ខភាពទាំងអស់​ដែល​ឈ្នះ​រង្វាន់​នឹង​ទទួល​បានដូចខាងក្រោម ៖ធ្វើឱ្យកេរ្តិ៍ឈ្មោះ និងការអភិវឌ្ឍរបស់លោកអ្នកកាន់តែសាយភាពទៅកាន់អតិថិជនក្នុងស្រុក និងអន្តរជាតិ ម្ចាស់អចលនទ្រព្យ និងវិនិយោគិនត្រូវបានវិនិច្ឆ័យដោយអ្នកដឹកនាំជាន់ខ្ពស់ក្នុងវិស័យអចលនទ្រព្យកម្ពុជា និងសាធារណជនទូទៅប្រកបដោយ​សុក្រិតភាពទទួលស្គាល់ និងគាំទ្រដោយក្រសួងរៀបចំដែនដី នគរូបនីយកម្ម និងសំណង់ទទួលស្គាល់ និងគាំទ្រដោយនិយតករអចលនទ្រព្យនៃប្រទេសកម្ពុជាអ្នកឈ្នះនឹងទទួលបានពានរង្វាន់ CREA ដ៏មានកិត្យានុភាព និងវិញ្ញាបនបត្របញ្ជាក់​ ដើម្បី​អាច​ដាក់​តាំង​បង្ហាញនៅក្នុងការិយាល័យ ឬបន្ទប់តាំងបង្ហាញ និងអាចប្រើប្រាស់នៅក្នុងព្រឹត្តិការណ៍ផ្សេងៗ​សម្រាប់បង្ហាញដល់អតិថិជន ឬអ្នកវិនិយោគអ្នកឈ្នះនឹងទទួលបានត្រាផ្លូវការរបស់ CREA សម្រាប់ការ​ប្រើប្រាស់​លើសម្ភារដើម្បីការធ្វើ​ទីផ្សារ​របស់លោកអ្នកEnter the Cambodia Real Estate Awards 2023ឯកឧត្តម លី រស្មី រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បេក្ខជនដែលអាចចូលរួមក្នុងពានរង្វាន់នេះក្រុមហ៊ុន និងបុគ្គលដែលមានអាជ្ញាប័ណ្ណស្របច្បាប់ត្រឹមត្រូវទាំងអស់ត្រូវបានអនុញ្ញាតឱ្យចូលរួមក្នុង ព្រឹត្តិការណ៍ CREA 2023 នេះដោយមិនគិតពីចំនួន ឬទំហំទ្រព្យសម្បត្តិនៃប្រតិបត្តិការក្រុមហ៊ុន របស់ពួកគេ ។ក្នុងនោះផងដែរក៏មានការចូលរួមពីរដ្ឋាភិបាល, ក្រសួងរៀបចំដែនដី នគរូបនីយកម្ម និងសំណង់, និយតករ​អចលន​ទ្រព្យ​នៃប្រទេសកម្ពុជា និងសមាគមអ្នកវាយតម្លៃ និងភ្នាក់ងារ អចលនវត្ថុកម្ពុជា ដើម្បីផ្តល់នូវភាពយុត្តិធម៌ និង​សុក្រិត​ភាពតាំងពីការវិច្ឆ័យដំបូងរហូតដល់បញ្ចប់ ។ ភាពយុត្តិធម៌ និងសុក្រិតភាព​ទាំងអស់​នេះត្រូវ​បានធ្វើ​ឡើង​ដើម្បីទទួលស្គាល់នូវសមិទ្ធផលនានាក្នុងវិស័យអចលនទ្រព្យនៅកម្ពុជាប្រកបដោយតម្លាភាព និងផ្អែក​លើ​មូលដ្ឋាន​ទាំងស្រុង ។របៀបចុះឈ្មោះចូលរួម ៖ដើម្បីចូលរួមក្នុងព្រឹត្តិការណ៍ពានរង្វាន់អចលនទ្រព្យកម្ពុជា CREA 2023 សូមធ្វើការ​ទាក់ទង​មក​ក្រុមការងារ​របស់យើងខ្ញុំ ឬទាញយកទម្រង់ចុះឈ្មោះនៅ «ទីនេះ» ។អត្ថប្រយោជន៍នៃការចូលរួម ៖ អាចពង្រឹងជំហរបន្ថែមនៅក្នុងទីផ្សារអចលនទ្រព្យកម្ពុជាទទួលស្គាល់ជាផ្លូវការ ជាអ្នកឈានមុខគេនៅក្នុងវិស័យអចលនទ្រព្យនៅកម្ពុជាអាចបង្កើតទំនាក់ទំនងជាមួយអ្នកជំនាញនានាមកពីវិស័យអចលនទ្រព្យអាចទទួលបានការសិក្សាបន្ថែមលើការអភិវឌ្ឍក្នុងវិស័យកម្មអចលនទ្រព្យទទួលបានពានរង្វាន់អចលនទ្រព្យកម្ពុជា និងវិញ្ញាបនបត្របញ្ជាក់អាចប្រើប្រាស់កិត្យានុភាពពានរង្វាន់ដើម្បីពង្រឹងអាជីវកម្មរបស់ខ្លួនតើលោកអ្នកចាប់អារម្មណ៍ព្រឹត្តិការណ៍ពានរង្វាន់អចលនទ្រព្យកម្ពុជា 2023 ដ៏មានកិត្យានុភាពនេះឬទេ? សូមចូលទៅកាន់គេហទំពរ www.cambodiarealestateawards.com ឬតាមដាននៅលើហ្វេសប៊ុកផេកផ្លូវការ «Cambodia Real Estate Awards» ។Enter the Cambodia Real Estate Awards 2023សម្រាប់ព័ត៌មានបន្ថែមនៃការចូលរួម CREA 2023 សូមទំនាក់ទំនង ៖ផ្នែកពានរង្វាន់សម្រាប់អ្នកអភិវឌ្ឍន៍ និងការអភិវឌ្ឍ (ភាសាខ្មែរ & អង់គ្លេស) ៖Name: Ms. Annabelle Vong (Anna)Position: Event - Sales ManagerEmail: annabelle.vong@realestate.com.khPhone: +855 (0) 17 426 797 Chinese:Name: Ms. Muyngy Taing (Muyngy)Position: CREA Developers & Development Entry Facilitator & REAKH Relationship ManagerEmail: muyngy.taing@realestate.com.khPhone: +855 (0) 10 723 379ផ្នែកពានរង្វាន់សម្រាប់ភ្នាក់ងារ  (ភាសាខ្មែរ & អង់គ្លេស) ៖Name: Ms. Sokphea Rorm (Phea)Position: CREA Agent Entry Facilitator & REAKH Relationship ManagerEmail: sokphea.rorm@realestate.com.khPhone: +855 (0) 81 921 707 / (0) 89 428 028Chinese:Name: Ms. Muyngy Taing (Muyngy)Position: CREA Agent Entry Facilitator & REAKH Relationship ManagerEmail: muyngy.taing@realestate.com.khPhone: +855 (0) 10 723 379ផ្នែកម្ចាស់ឧបត្ថម្ភពានរង្វាន់អចលនទ្រព្យកម្ពុជា ៖Name: Ms. Annabelle Vong (Anna)Position: Event - Sales ManagerEmail: annabelle.vong@realestate.com.khPhone: +855 (0) 17 426 797

រាជធានីភ្នំពេញ ៖ ឯកឧត្តម លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូនបានអញ្ជើញ​ដឹកនាំ​កិច្ច​ប្រជុំ​ពិភាក្សា​លើក​ទី១ នៃគម្រោងលើកកម្ពស់គុណភាពផ្លូវជាតិលេខ៧ ពីស្គន់ដល់ក្រុងកំពង់ចាម ខេត្តកំពង់ចាម ដោយ​មានការ​អញ្ជើញ​ចូលរួមពីក្រុមហ៊ុនសាជីវកម្មស្ពាន និងថ្នល់ចិន (CRBC) និងមន្ត្រី ជំនាញ​ពាក់ព័ន្ធ​ជាច្រើន​រូបផង​ដែរ ។ កិច្ចប្រជុំនេះធ្វើឡើងនាទីស្ដីការក្រសួងកាលពីថ្ងៃទី២៥ ខែវិច្ឆិកា ឆ្នាំ២០២២ កន្លងទៅនេះ ។កិច្ចប្រជុំនេះរៀបចំឡើងក្នុងគោលបំណងចំនួន៣ធំៗដើម្បីរៀបចំ និងបែងចែកក្រុមការងារដើម្បីដោះស្រាយបញ្ហា​ប្រឈមសម្រាប់ការបើកការដ្ឋានសាងសង់នាពេលខាងមុខដូចជា ៖ ទី១)- ណែនាំសមាសភាពក្រុមការងារក្រសួងសាធារណការ និង ដឹកជញ្ជូន ទៅកាន់ក្រុមហ៊ុនសាជីវកម្មស្ពាន និងថ្នល់ចិន (CRBC) ដើម្បីឱ្យក្រុមការងារទាំងពីរ​អាចសហការ​ការងារ​បានរលូន​ប្រកប​ដោយ​ប្រសិទ្ធភាពទី២)- ធ្វើបទបង្ហាញពីលទ្ធផលនៃការសិក្សាគម្រោងលើកកម្ពស់គុណភាពផ្លូវជាតិលេខ៧ ពីស្គន់ ដល់ក្រុងកំពង់ចាមទី៣)-បែងចែកក្រុមការងារសម្រាប់ដោះស្រាយការងារបន្ទាន់ ការរៀបចំ​សណ្ដាប់ធ្នាប់​ទីតាំង​ការ​ដ្ឋាន និងត្រៀម​ផ្សព្វ​ផ្សាយ​ជូនដំណឹងដល់ប្រជាពលរដ្ឋអំពីការបើកការដ្ឋានសាងសង់ផ្លូវជាតិលេខ៧​នេះ​នា​ពេលឆាប់ៗខាងមុខ ។សូមជម្រាបជូនថា គម្រោងលើកកម្ពស់គុណភាពផ្លូវជាតិលេខ៧ មានប្រវែង ៤៥,៥០ គីឡូម៉ែត្រ គិតចាប់ ពីស្គន់ ដល់​ក្រុងកំពង់ចាម ខេត្តកំពង់ចាម ពង្រីកទៅជាផ្លូវ៤គន្លង (ពីរគន្លងទៅពីរគន្លងមក) គ្រោងចំណាយថវិកា​សរុប​ប្រមាណ ១១៤,៨៩ លានដុល្លាសហរដ្ឋអាមេរិក ជាហិរញ្ញប្បទានពីសាធារណរដ្ឋប្រជាមានិតចិន គ្រោងចំណាយ​ពេល​សាងសង់ប្រមាណ៣៦ខែ អនុវត្តការងារសាងសង់ដោយក្រុមហ៊ុន សាជីវកម្មស្ពាន និងថ្នល់ចិន ៕ កំពុងស្វែងរកទិញលក់ ឬជួលអចលនទ្រព្យមែនទេ? ពួកយើងអាចជួយអ្នកបាន !

ខេត្តកំពត ៖ អ្នកនាំពាក្យក្រសួងបរិស្ថានបានអំពាវនាវដល់បងប្អូន​ប្រជាពល​រដ្ឋ​កុំបន្តចាញ់បោក​ក្រុមជនខិលខូច​ដែល​បាន​គប់​គិតគ្នាបោកប្រាស់ប្រជាពលរដ្ឋទិញលក់ដីនៅក្នុងតំបន់​ការពារធម្មជាតិដែលមានផ្ទៃដីទំហំ ១,៨០០ហិកតា ដោយអះអាងថាជាដីស្របច្បាប់ និងអាចរត់ការធ្វើបណ្ណសម្គាល់កម្មសិទ្ធិបាន ប៉ុន្តែតាមពិត​គឺមិនអាចទៅរួចឡើយ ។លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យ នៃក្រសួងបរិស្ថានបានគូសបញ្ជាក់ថា ផ្ទៃដីដែលមានទំហំ ១,៨០០ហិកតា ដែលជនខិលខូចរៀបចំផែនទីដាក់លក់នោះជាផ្ទៃដីព្រៃ ស្ថិតក្នុងឧទ្យានជាតិព្រះមុនីវង្សបូកគោ ។ ផ្ទៃដី​មួយ​ចំនួនត្រូវបានជនទុច្ចរិតលួចចូលឈូសឆាយទន្ទ្រានកាន់កាប់ដោយខុសច្បាប់ ដើម្បីលក់ដូរ ហើយ​ត្រូវ​​បាន​កសាង​សំណុំរឿងនៅតុលាការដើម្បីចាត់ការតាមផ្លូវច្បាប់រួចរាល់ហើយដែរ ។មន្ត្រីនៃមន្ទីរបរិស្ថានបានធ្វើការតាមដាន និងធ្វើចំណាត់លើហ្វេសប៊ុកមួយឈ្មោះថា NL Real Estate Cambodia បាន​ដាក់បង្ហាញផែនទី និងទីតាំងដីទំហំ ១,៨០០ហិកតា និងរូបភាពមួយចំនួនសម្រាប់លក់ ។ ក្រុមមន្ត្រី​បាន​សួរ​នាំ​ភ្នា​ក់​ងារ​លក់ដីដែលធ្វើសកម្មភាពនោះដោយបានបញ្ជាក់ថាឈ្មោះ សុខ ម៉ាប់ ជាតំណាងម្ចាស់ដី ។តាមការបញ្ជាក់របស់មន្ត្រីនៃមន្ទីរបរិស្ថានខេត្តកំពត ឈ្មោះ សុខ ម៉ាប់ នេះគឺជាជនសង្ស័យមួយរូបក្នុងចំណោម២រូប ដែលមន្ទីរបរិស្ថានខេត្តកំពត បានកសាងសំណុំរឿងបញ្ជូនទៅតុលាការពាក់ព័ន្ធ​នឹងការ​ទន្ទ្រាន​ដីព្រៃខុស​ច្បាប់​នៅ​ក្នុង​ភូមិអន្លង់ក្មេងលេង ឃុំតេជោ អភិវឌ្ឍន៍ ស្រុកឈូក ខេត្តកំពត ជាមួយឈ្មោះ ឡៅ អាន់ ដែលជាឪពុករបស់ខ្លួន ។មន្ត្រីនៃមន្ទីរបរិស្ថានខេត្តកំពត បានបន្តថា ជាមួយភស្តុតាង និងសាក្សីថ្មីនេះ មន្ទីរបរិស្ថានខេត្ត កំពត នឹងរៀប​ចំសំណុំ​ឯកសារភស្តុតាងបន្ថែមដាក់ជូនទៅតុលាការដើម្បីបន្តនីតិវិធីច្បាប់ ដើម្បីចាត់ការលើជនទុច្ចរិត រួមនឹងបក្ខពួក​នៅពី​ក្រោយដែលឃុបឃិតគ្នាចូលរុករានទន្ទ្រានដីព្រៃរដ្ឋដោយខុសច្បាប់ ៕ កំពុងស្វែងរកទិញលក់ ឬជួលអចលនទ្រព្យមែនទេ? ពួកយើងអាចជួយអ្នកបាន !

រាជធានីភ្នំពេញ ៖ ឯកឧត្តម សុខុម ភគវន្តមុនី រដ្ឋលេខាធិការក្រសួងសាធារណការ និងដឹកជញ្ជូន ទទួល បន្ទុក​ជាប្រធានគណៈកម្មការវិវេចនាលទ្ធកម្ម (PRC) បានអញ្ជើញដឹកនាំគណៈកម្មការវិវេចនាលទ្ធកម្ម (PRC) ស្តីពី​គម្រោងរៀបចំច្រកទ្វាអន្តរជាតិស្ទឹងបត់ និងផ្លូវតភ្ជាប់មកផ្លូវជាតិលេខ៥ ដោយមានការចូល រួមពីថ្នាក់​ដឹក​នាំ​ក្រសួង តំណាងក្រសួងសេដ្ឋកិច្ច និងហិរញ្ញវត្ថុ និងមន្ត្រី ជំនាញផងដែរ ។ កិច្ចប្រជុំនេះធ្វើឡើង​នាទីស្ដី​ការ​ក្រសួងកាលពីថ្ងៃទី២១ ខែវិច្ឆិកា ឆ្នាំ២០២២ កន្លងទៅនេះ ។កិច្ចប្រជុំនេះរៀបចំឡើងក្នុងគោលបំណងដើម្បីពិភាក្សាលើការងារពន្យារពេលសាងសង់ បម្រែបម្រួល ការងារក្នុងកិច្ចសន្យា ការពន្យាពេលកិច្ចសន្យា និងការបន្ថែមប្រាក់ឈ្នួលសម្រាប់សេវាត្រួតពិនិត្យបច្ចេក ទេសគម្រោង ព្រមទាំងការស្នើសុំពិនិត្យលើបម្រែបម្រួលតម្លៃសម្ភារៈសំណង់ និងអត្រាប្តូរប្រាក់របស់ ក្រុមហ៊ុនសាងសង់ផងដែរ ។សូមជម្រាបជូនថា គម្រោងសាងសង់ស្ថានីយច្រកទ្វារព្រំដែនស្ទឹងបត់ និងផ្លូវតភ្ជាប់ទៅផ្លូវជាតិលេខ៥ គិតរហូតមកទល់ពេលនេះ សម្រេចវឌ្ឍនភាពការងារបាន៧២%ហើយ ដែលក្នុងនោះរួមមាន៖ អគារច្រក ទ្វារអន្តរជាតិ និងផ្លូវតភ្ជាប់ទៅផ្លូវជាតិលេខ៥ អគារអន្តេវាសិកដ្ឋាន ចំណតផ្ទេរផ្ទុកទំនិញ ឃ្លាំង និង ទីលានកុងតឺន័រផងដែរ ៕ កំពុងស្វែងរកទិញលក់ ឬជួលអចលនទ្រព្យមែនទេ? ពួកយើងអាចជួយអ្នកបាន !

វិស័យអចលនទ្រព្យកម្ពុជាមានការរីកដុះដាលក្នុងរយៈពេលប៉ុន្មានឆ្នាំចុងក្រោយនេះ ខណៈដែលកំណើន​សេដ្ឋកិច្ច​របស់ប្រទេសកម្ពុជាត្រូវបានគេមើលឃើញថា មានសភាពល្អប្រសើរ បើទោះបីជាត្រូវរងផលប៉ះពាល់​ពីជំងឺ​រាតត្បាត​កូវីដ-១៩ក៏​ដោយ ។អ្នកអភិវឌ្ឍន៍អចលនទ្រព្យមួយចំនួនបានព្យាយាមអភិវឌ្ឍន៍អចលនទ្រព្យរបស់ខ្លួនដើម្បីបំពេញ​តាមតម្រូ​វការ​នៃ​លំនៅឋានសម្រាប់វណ្ណៈកណ្តាល ជនបរទេស និងវិនិយោគិនអន្តរជាតិដែលចាប់អារម្មណ៍លើវិស័យ​អចលន​ទ្រព្យ​នៅក្នុង​ប្រទេសកម្ពុជាយ៉ាងខ្លាំងដែលផ្តល់ HNWI (High Net Worth Individuals) ទាំងក្នុងស្រុក និងអន្តរជាតិ ។ក្រុមអ្នកវិនិយោគ និងប្រជាជនកម្ពុជា ដែលដើរតួយ៉ាងសំខាន់ជំរុញឱ្យត្រូវការលំនៅឋានប្រណីតៗ​នៅក្នុងប្រទេស​កម្ពុជា​មានការកើនឡើងជាបន្តបន្ទាប់ ។ទោះបីជាទីផ្សារអចលនទ្រព្យក្នុងស្រុកកំពុងបង្ហាញពីការងើបឡើងវិញយឺតបន្តិចក៏ដោយ ជាមួយនឹង​ការផ្គត់​ផ្គង់​ទីផ្សារអចលនទ្រព្យដែលកំពុងមានតម្រូវការ ត្រូវបានគេមើលឃើញថា ជាឱកាសដ៏ធំសម្រាប់ការ​វិនិយោគ​ក្នុងវិស័យ​អចលនទ្រព្យនៅក្នុងប្រទេសកម្ពុជា ។ការកើនឡើងនៃ HNWIទោះបីជាគេមិនទាន់ដឹងច្បាស់ថាចំនួន HNWI មានចំនួនប៉ុន្មាននៅក្នុងប្រទេសកម្ពុជា ប៉ុន្តែ "របាយ​ការណ៍​អចលន​ទ្រព្យ​ឆ្នាំ2015" បានប៉ាន់ប្រមាណថា ប្រជាជនកម្ពុជាដែលមានទ្រព្យសម្បត្តិសុទ្ធខ្ពស់បំផុត (អ្នកដែល​មាន​ទ្រព្យ​សម្បត្តិ​សរុបជាង 30 លានដុល្លារ) បានកើនឡើងជិតបីដងក្នុងរយៈពេលមួយទសវត្សរ៍ ។តាមរយៈរបាយការណ៍ Capgemini ដែលត្រូវបានចេញផ្សាយថ្មីៗក្នុងឆ្នាំ 2021 បានបង្ហាញថា ឥឡូវនេះមាន​មហា​សេដ្ឋី​ជា​ង​​បីពាន់​នាក់​នៅក្នុងប្រទេសកម្ពុជា (កើនឡើងជាងពីរពាន់នាក់ក្នុងរយៈពេលប្រាំឆ្នាំ!)ផ្អែកលើរបាយការណ៍ទ្រព្យសម្បត្តិប្រចាំឆ្នាំ 2022 របស់ APAC ចន្លោះឆ្នាំ 2021 ដល់ឆ្នាំ 2026 ត្រូវបានគេព្យាករណ៍ថា នឹងមានកំណើន​គួរឱ្យកត់សម្គាល់​បំផុតនៅក្នុង​ចំនួន​ប្រជាជន HNWIs (59.8%) និង UHNWIs (32.7%)  ហើយវានឹងក្លាយជាមជ្ឈមណ្ឌលទ្រព្យសម្បត្តិក្នុងតំបន់ដ៏ធំបំផុតនៅឆ្នាំ 2026 ។Capgemini បន្ថែមថា ប្រទេសកំពូលទាំង 5 នៅអាស៊ីដែលមាន HNWI ច្រើនជាងគេក្នុងឆ្នាំ 2022 គឺ៖ប្រទេសជប៉ុន (3.65 លាននាក់)ប្រទេសចិន (1.53 លាននាក់)អូស្ត្រាលី (319,000)ប្រទេសឥណ្ឌា (308,000)កូរ៉េខាងត្បូង (272,000)របាយការណ៍បានបន្ថែមថា ផ្នែកសិល្បៈ, រថយន្ត និងស្រា ជាប់ចំណាត់ថ្នាក់ក្នុងចំណោមចំណូលចិត្តកំពូលទាំងបី​សម្រាប់​ប្រជាជនអ្នកមាននៅអាស៊ីប៉ាស៊ីហ្វិក ហើយវាក៏ត្រូវបានគេចាប់អារម្មណ៍ផងដែរ​នៅក្នុង​ប្រទេស​កម្ពុជា ។បន្ទប់តាំងបង្ហាញរថយន្តដែលបង្ហាញម៉ាករថយន្តស្ព័រល្អបំផុតមួយចំនួនដូចជា Ferraris និង Lamborghinis , Maserati, Bentley, McLaren, Aston Martin និង Rolls-Royce ក្នុង​ប្រទេស​កម្ពុជា មាន​អត្រា​លក់​ជោគជ័យ​បំផុត​នៅ​ទូទាំង​ពិភពលោក ។ទន្ទឹមនឹងនេះដែរម៉ាកប្រណីតជាច្រើនដូចជា Brioni, Balenciaga, Burberry, Bottega Veneta, Canali, Clarins, Christofle, Dolce&Gabbana, Salvatore Ferragamo, Frette, Hugo Boss, L'Occitane en Provence, Moncler, Poltrona Frau, Stefano Ricci និង Santoni ក៏បានចូលទីផ្សារកម្ពុជាដែរ ។ទីផ្សារអចលនទ្រព្យប្រណីតនៅកម្ពុជាលោក Tom O’Sullivan នាយកប្រតិបត្តិ នៃក្រុមហ៊ុន DCG Cambodia (FazWaz Cambodia & Realestate.com.kh) បាន​និយាយអំពីការស្វែងរកអចលនទ្រព្យនៅលើវេទិកាអនឡាញអចលនទ្រព្យក្នុងឆ្នាំ 2022 ថា អតិថិជនជាច្រើនគឺជាបុគ្គលដែលមានទ្រព្យសម្បត្តិសុទ្ធខ្ពស់ ។ ចំនួនអ្នកស្វែងរកតាមអ៊ីនធឺណិតនៅលើ realestate.com.kh ដែលកំពុងស្វែងរកអចលនទ្រព្យដែលមានតម្លៃលើសពី $4.5 លានដុល្លារបានកើនឡើង 50% នៅឆ្នាំនេះ ។ថ្មីៗនេះ ក្រុមហ៊ុន Moody's Investors Service Inc បានទម្លាក់ចំណាត់ថ្នាក់​នៃទស្សនវិស័យរបស់ប្រទេសកម្ពុជា​បានយោងទីផ្សារអចលនទ្រព្យ ដោយក្នុងរបាយការណ៍របស់ពួកគេដែលនិយាយថា "ការថយចុះនៃសកម្មភាពនៅ​ក្នុង​វិស័យអចលនទ្រព្យប្រណីតបង្កហានិភ័យយ៉ាងទូលំទូលាយដល់កំណើន" ។ ប្រសិនបើ​អ្វី​មួយ​នេះ​បញ្ជាក់​ពី​ការ​ផ្គត់ផ្គង់​លើស​កម្រិត​នៃ​អចលនទ្រព្យ​កម្រិត​មធ្យម ប៉ុន្តែ​មិន​មាន​ប្រភេទ​ប្រណីត​នៅ​ក្នុង​ទីផ្សារ​បច្ចុប្បន្ន​ទេ ។ដូច្នេះ តើ​ការ​អភិវឌ្ឍ​ប្រណីត និង​ការ​ផ្លាស់​ប្តូរ​និន្នាការ​អ្វី​ខ្លះ​ក្នុង​ព្រះរាជាណាចក្រ​កម្ពុជា​ដែល​ទាក់ទាញ​អ្នក​ទិញ​ក្រុម​អភិជន​នេះ?អ្នកអភិវឌ្ឍន៍បុរីបានចាប់ផ្តើមបន្ថែមផ្ទះវីឡាតម្លៃរាប់លានដុល្លារទៅក្នុងផលិតផលរបស់ពួកគេ ដោយអ្នក​អភិវឌ្ឍន៍​តិចតួច​ណាស់ដែលមានបំណងរចនាគម្រោងអភិវឌ្ឍន៍អចលនទ្រព្យប្រណីត ជាមួយនឹងផ្ទះខ្លះមានដល់ទៅ 4.5 លានដុល្លារ ឬច្រើនជាងនេះ ។គម្រោងឧត្តម គឺជាឧទាហរណ៍មួយនៃការអភិវឌ្ឍន៍ខុនដូលំដាប់ខ្ពស់ ដើម្បីចូលមកទីផ្សារកម្ពុជា ទោះជាយ៉ាងនេះក្តី នៅតែមិនទាន់មានការអភិវឌ្ឍន៍អចលនទ្រព្យប្រណីតនៅលើទីផ្សារនាពេលបច្ចុប្បន្ននេះ។វីឡាទោលដ៏ប្រណីតនៅទួលគោក ជាទូទៅមានតម្លៃចន្លោះពី ៥ ទៅ ៨ លានដុល្លារ។ ទោះជាយ៉ាងណាក៏ដោយ អចលនទ្រព្យទាំងនេះកម្រមាននៅលើទីផ្សារសម្រាប់លក់ណាស់។តម្រូវការកំពុងកើនឡើងសម្រាប់ការជួលអចលនទ្រព្យប្រណីត - វីឡាលំដាប់ខ្ពស់មួយត្រូវបានជួលនាពេលថ្មីៗនេះក្នុងតម្លៃ $15,000 ក្នុងមួយខែនៅក្នុងរដ្ឋធានី។ ផ្ទះវីឡានេះមានបន្ទប់គេង 7 បន្ទប់ទឹក 8 ទីធ្លាស្មៅធំទូលាយ អាងហែលទឹក និងកន្លែងផ្សេងៗទៀត។ទោះបីជាមានការកើនឡើងនៃតម្រូវការអចលនទ្រព្យប្រណីតនៅក្នុងប្រទេសកម្ពុជាក៏ដោយ ប៉ុន្តែការផ្គត់ផ្គង់​នៅលើ​ទីផ្សារមានកម្រិត។ High Networth Individuals និង Ultra High Networth Individuals មិនមានជម្រើសច្រើនទេ​​នៅពេលស្វែងរកផ្ទះប្រណីត ប៉ុន្តែពួកគេមានធនធានហិរញ្ញវត្ថុកាន់តែច្រើនឡើ​ងដើម្បី​ចំណាយលើទ្រព្យ​សម្បត្តិ​ទាំងនេះ។អ្នកអភិវឌ្ឍន៍កំពុងស្វែងរកការផ្លាស់ប្តូរម៉ាកយីហោដើម្បីទាក់ទាញទីផ្សារប្រណីត ហើយបានកំណត់ថា នេះជា​វិស័យ​ដែលរកប្រាក់ចំណេញ និងរីកចម្រើននៅក្នុងទីផ្សារអចលនទ្រព្យកម្ពុជា ហើយអ្នកអភិវឌ្ឍន៍ និងអ្នកទីផ្សារ​នឹង​ជួយ​​បង្កើត​រូបភាពនៃទីផ្សារលំនៅឋានប្រណីតនេះបើធៀបនឹងលំនៅឋានធម្មតា ។ដោយសាររដ្ឋាភិបាលកម្ពុជាបានគ្រប់គ្រងជំងឺរាតត្បាតកូវីដ-១៩ និងជាមួយគោលនយោបាយ​វិនិយោគ​ដែល​គាំទ្រ​វិនិយោគិនពីបរទេស សូចនាករនេះមានភាពភ្លឺស្វាងសម្រាប់ទីផ្សារក្នុងស្រុក ហើយវា​នៅតែ​ស្ថិតក្នុង​ទីតាំង​ល្អមិនគួរឱ្យជឿនៅក្នុងតំបន់អាស៊ាន ។ការអភិវឌ្ឍន៍ប្រណីតភាពពិសេស និងលំដាប់ខ្ពស់នៅក្នុងប្រទេសកម្ពុជាមានភាពចំណេញ និងមានសក្ដានុពលខ្ពស់ អ្នកទិញកំពុងសម្លឹងមើលទីផ្សារអចលនទ្រព្យប្រណីតក្នុងព្រះរាជាណាចក្រកម្ពុជាយ៉ាងសកម្ម ហើយការវិវឌ្ឍន៍​ណាខ្លះ​អាចស័ក្តិសមនឹងការរស់នៅប្រកបដោយគុណភាព និងរសជាតិសម្រាប់អ្វីដែលល្អជាងក្នុងជីវិត ៕

រាជធានីភ្នំពេញ ៖ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បាន​អញ្ជើញ​ដឹក​នាំកិ​ច្ចប្រជុំ ដើម្បីពិនិត្យពិភាក្សាលើវិធីធ្វើឱ្យប្រសើរឡើងលើការគ្រប់គ្រងការចេញចូល ផ្លូវល្បឿនលឿនភ្នំពេញ-ក្រុងព្រះសីហនុ បានលឿនរហ័ស កាត់បន្ថយការកកស្ទះ ដោយមានការចូលរួមពី លោក Zhou Yang អគ្គនាយក​ក្រុមហ៊ុនសាជីវកម្មស្ពានថ្នល់ចិន លោក Mo Kun អគ្គនាយកក្រុមហ៊ុនផ្លូវល្បឿនលឿនភ្នំពេញព្រះសីហនុ ថ្នាក់ដឹក​នាំក្រសួង និងមន្ត្រីជំនាញនៃអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ ។ កិច្ចប្រជុំនេះ​ធ្វើឡើង​នាទីស្តី​ការ​ក្រសួងកាលពីព្រឹកថ្ងៃទី១៦ ខែវិច្ឆិកា ឆ្នាំ២០២២ ។កិច្ចប្រជុំបានផ្តោតសំខាន់ទៅលើការធានាលំហូរយានយន្តចូលចេញដែលកន្លងទៅតម្រូវឱ្យបង់ជាសាច់ប្រាក់នៅគ្រប់គន្លងច្រកចេញ ពីផ្លូវល្បឿនលឿន ជាបច្ច័យអាចធ្វើឱ្យការកកស្ទះ នៅពេលមានតម្រូវការចរាចរណ៍ខ្ពស់ ជា​ពិសេស​ថ្ងៃបុណ្យទាន និងថ្ងៃឈប់សម្រាកនានា ។អង្គប្រជុំបានធ្វើការពិភាក្សាយ៉ាងផុសផុល ដោយលើកយកបញ្ហាប្រឈមមួយចំនួន ដែលបានកើតឡើង​ក្នុងរយៈ​ពេល​ពីរ​សប្តាហ៍កន្លងទៅ និងពិភាក្សាលើដំណោះស្រាយថ្មី តាមប្រព័ន្ធបច្ចេកវិទ្យា DIP អនុញ្ញាតឱ្យបញ្ចូល​ប្រាក់​តាម​ផ្លាក​លេខ ANPR មុនចូលចូលប្រើប្រាស់ផ្លូវល្បឿនលឿន ដែលបានប្រកាសដាក់ឱ្យសាកល្បង កាលពីថ្ងៃទី១៤ វិច្ឆិកា ២០២២ កន្លងទៅ ។សូមជម្រាបជូនថា ប្រព័ន្ធបច្ចេកវិទ្យា DIP គឺជាគំនិតផ្តួចផ្តើមមួយ ត្រូវបានដាក់ចេញដើម្បី ធានាការ​ធ្វើអាជីវកម្ម​របស់​ក្រុមហ៊ុន កាន់តែមានតម្លាភាព ក្នុងការគ្រប់គ្រងការងារផ្តល់សេវាប្រើប្រាស់ផ្លូវ ការកត់ត្រាការប្រមូល​​ចំណូល​សម្រាប់​​​​​​ការបង់ពន្ធជូនរាជរដ្ឋាភិបាល ឱ្យបានត្រឹមត្រូវ ។ ប្រព័ន្ធនេះក៏នឹងធានា​ឱ្យការ​ធ្វើដំណើរ​កាន់តែ​មាន​សុវត្ថិ​ភាពខ្ពស់ កាត់បន្ថយគ្រោះថ្នាក់ចរាចរណ៍ និងទទួលបានសេវាប្រើប្រាស់ផ្លូវបានលឿនរហ័ស ជៀសផុតពីជំងឺកូវី-១៩ កាត់បន្ថយភាពស្មុគស្មាញ និងកាត់បន្ថយការរង់ចាំយូរដែលបណ្តាលមកពីការកកស្ទះចរាចរណ៍ ជាដើម…។ល។ដើម្បីឱ្យការចេញពីផ្លូវបានលឿនរហ័ស ក្រោមការចង្អុលបង្ហាញពី ឯកឧត្តមទេសរដ្ឋមន្ត្រី រដ្ឋមន្ត្រីក្រសួង​សាធារណ​ការ និងដឹកជញ្ជូន អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ បានសហការរួមគ្នាជាមួយ​ក្រុមហ៊ុនផ្លូវ​ល្បឿនលឿន បានសម្រួលផ្តល់លទ្ធភាព ឱ្យអ្នកបើកបរ អាចធ្វើការបញ្ចូលសមតុល្យទឹកប្រាក់ជាមុនទៅក្នុង ផ្លាកលេខសម្គាល់យានយន្ត មុនចូលប្រើប្រាស់ផ្លូវល្បឿនលឿន។ នេះគឺជាផ្នែកមួយនៃ ប្រព័ន្ធបច្ចេកវិទ្យា DIP របស់ក្រសួងសាធារណការ និងដឹកជញ្ជូន ។ការបញ្ចូលទឹកប្រាក់ក្នុងផ្លាកលេខ ជាមុន (Prepaid License Plate Top-Up) ត្រូវបានផ្តល់លទ្ធភាពឱ្យធ្វើ តាមកម្មវិធីទូរសព្ទដៃទូទាត់ប្រាក់អេឡិចត្រូនិក (Mobile Banking) ឬបញ្ជរបង់ប្រាក់ របស់គ្រឹះស្ថានហិរញ្ញវត្ថុ និងធនាគារដៃគូ របស់ក្រសួងសាធារណការ និងដឹកជញ្ជូន ៕កំពុងស្វែងរកទិញលក់ ឬជួលអចលនទ្រព្យមែនទេ? ពួកយើងអាចជួយអ្នកបាន !